Kryeministri Edi Rama doli para medias për rastin e vrasjes së 14-vjeçarit Martin Cani, qëlluar me thikë nga një bashkëmoshatar te ambientet jashtë shkollës “Fan Noli” në Tiranë.
Ç’duhet të bërë që të parandalohen ngjarje të tilla tragjike?
Rama tha se qeveria po mendon të ndalojë përdorimin e TikTok-ut dhe Snapchat-it.
“I madh e i vogël është tronditur nga vrasja makabre me thikë e një 14-vjeçari nga një adoleshent tjetër. Rrjetet sociale, posaçërisht TikTok-u apo Snapchat-i, thithin përditë në labirintet e tyre fëmijët që në moshë të vogël. Autoriteti i prindërve dhe mësuesve dhe të gjitha përpjekjet tona në familje dhe shkollë për edukimin e fëmijëve sfidohen nga bota paralele e këtyre rrjeteve ku nuk ka asnjë filtër, asnjë mbrojtje, dhe edukimi e shëndeti mendor i të vegjëlve vihen në pikëpyetje. Të gjithë biem dakord si prindër apo si qytetarë që garantimi i sigurisë së fëmijëve është përparësia jonë. Por nuk janë kaq të thjeshta përgjigjet; shumë shtete po mundohen të vendosin filtra mbrojtës, por pa asnjë rezultat domethënës”, tha Rama, duke sjellë dhe referenca nga shtete të tjera.
“Jemi angazhuar prej kohësh në hulumtimin e kësaj problematike, duke parë vendet e tjera. Vende si Australia po tentojnë ndalimin e aksesit në rrjetet sociale të fëmijëve deri në 16 vjeç, Franca po vendos kusht aprovimin e prindërve për hapjen e llogarive…
Përtej debateve, problem mbetet mungesa e një sistemi të zbatimit të tyre.
Tani, dilema jonë si qeveri është nëse duhet të provojmë edhe ne të ecim në drejtim të vendosjes së filtrave, ku në fakt nga eksperiencat e të tjerëva mësojme se efektiviteti i tyre është shumë i ulët, apo të ndërmarrim një masë drastike për mbylljen e plotë të TikTok-ut dhe Snapchat-it. Këtë do ta shtrojmë për diskutim për të marrë një vendim për këtë problem kompleks”, theksoi i pari i qeverisjes.
Nga ana tjetër, Rama përmendi modelin emiratas në shkolla, i tillë që duhet aplikuar dhe te ne.
“Kemi adresuar temën i sigurisë në shkolla. Po punojmë intesivisht për ngritjen e një sistemi digjital për kontrollin e çdo shkolle e klase me kamera inteligjente të rrugëve. Po punojmë prej një viti për këtë projekt me qeverinë e Emirateve të Bashkuara, ku ky sistem është realizuar me sukses të jashtëzakonshëm në aspektin e sigurisë dhe uljes së bullizmit në shkolla. Kemi dakordësuara dhe volumin e financimit me mbështetje të Abu Dhabit dhe së shpejti e prezantojmë publikisht projektin dhe synojmë ta përmbyllim plotësisht në harkun e 20 muajve dhe hap pas hapi shkollat do të pajisen me këtë sistem”.
Nga ana tjetër, Rama tha se duhet të rishikohen edhe sanksionet për ata që shkelin rregullin e ndalimit të celularëve në shkolla.
“Kemi ndaluar telefonat në shkolla dhe është koha për të rishikuar sanksionet për shkeljet e rritjen e këtij rregulli”.
Kreu i qeverisë iu drejtua prindërve duke thënë “që në pjesën time të frontit të bëjmë të gjitha gjërat e mundura për të lehtësuar fëmijët nga presioni hatashëm i rrjeteve sociale dhe për të rritur cilësinë e jetës së tyre. Pres sugjerime nga prindërit për qasjen ndaj TikTok e Snap Chat, sepse nga të gjitha hulumtimet tona, janë dy burimet më pjellore të çoroditjes nxitjes së dhunës dhe akteve të bullizmit deri në tragjedi si kjo e fundit, nga e cili duhet të dalim si shoqëri dhe shtet me përgjigje sa më efektive”. /tesheshi.com/
