Ministri shqiptar i Punëve të Brendshme në Maqedoni, Agim Nuhiu gjatë ditës së sotme ka mbajtur pres konferencë lidhur me ndodhitë e dhunshme në mbrëmjen e djeshme të protestuesve në Kuvend. Ai dënoi aktin barbar ndaj deputetëve dhe pranoi se policia nuk e ka bërë detyrën e duhur për tu përballur me incidentet. Ndërsa fajtori kryesor për këtë është zëvendësministri i Punëve të Brendshme, kuadër i VMRO-së, Mitko Çavkov, i cili ndonëse përgjegjës për menaxhim me situatën në Kuvend, ka refuzuar urdhërat e ministrit Nuhiu.
“Unë si ministër, në emër të ministrisë i dënoj ngjarjet që ndodhën mbrëmë në Kuvendin e Maqedonisë. Dua t’ju njoftoj se pjesë të MPB-së nuk e kanë kryer punën, për të cilën do të kenë përgjegjësi. Unë si ministër insistova që të formohet shtab të krizës ku janë përfshirë udhëheqës të policisë. Ishin të përfshirë tre skenare: protesta të qeta, kur do të zgjidhet kryetari i Kuvendit dhe kur do të zgjidhet qeveria. Përgjegjës të këtyre skenareve ishte Mitko Çavkov, i cili nuk ishte i kapshëm për mua, edhe pse e kam kërkuar. Për fat të keq, strukturat e MPB-së ishin të ndikuar politikisht që të respektojnë detyrat dhe ligjin. Këto struktura kanë respektuar urdhërat e partisë. Kontrolla e brendshme do të kërkojë përgjegjësi për të gjithë që nuk respektuan vendimet. MPB është institucion që patjetër të ruaj rendin dhe sigurinë e jo që do të punojë për urdhërat politike”, deklaroi Agim Nuhiu.
Në shenjë keqardhjeje dhe kërkim faljes Nuhiu paralajmëroi dorëheqje nga posti i tij, si ministër i MPB-së.
“Dua që edhe personalisht të falenderoj të gjithë zyrtarët që kanë bërë punën e tyre duke futur situatën në binarë. Prej mbrëmë kemi nisur bashkëpunimin me Prokurorinë Themelore Publike që të gjejmë fajtorët dhe bëj thirrje deri tek prokuroria që të dënojë fajtorët. Ajo që policia nuk e kreu detyrën ka nxitur konflikt para Kuvendit. Disa struktura as që kanë lejuar që Ndihma e Shpejtë nuk ka lejuar që të futet në oborrin e Kuvendit për të dhënë ndihmë. Ndjej përgjegjësi për mos heqjen e ndikimit të politikës në ministri. Për këtë tërhiqem nga posti, duke kërkuar edhe përgjegjësi nga strukturat që nuk kanë bërë punën”, shtoi Nuhiu./tesheshi.com/
