Qeveria ka vendosur të “marrë me të mirë” familjen spanjolle, e cila një ditë më parë përjetoi një sulm të dhunshëm në restorant “Panorama” në Porto Palermo të Himarës, e kjo nga vetë pronari i restorantit Mihal Kokëdhima.
Ky i fundit, siç thuhet, nuk ka duruar që klientët turistë nga Spanja t’i ngriheshin nga tavolina për mungesë korrektësie në shërbim, e i ka sulmuar, ata dhe automjetin me të cilin udhëtonin, deri dhe duke i gjakosur.
Ai u arrestua këtë të premte, ndërsa ministri i Mjedisit dhe Turizmit Blendi Klosi, rendi drejt familjes spanjolle për një “ndjesë” edhe zyrtare.
“Siç e tha edhe përfaqësuesi i familjes Galdon, një njeri i vetëm nuk përfaqëson Shqipërinë, sikundër vlerësoi reagimin e menjëhershëm të autoriteteve dhe interesimin e drejtpërdrejtë të qeverisë”, shkroi ministri Klosi.
Nga ana tjetër kryefamiljari spanjoll, ka ditur të ndajë rastin e veçantë nga e përgjithshmja, në përvojën e tij shqiptare.
“Pavarësisht kësaj eksperience që nuk do donim ta kalonim, ne jemi shumë të lumtur që erdhëm. Ashtu siç u thashë autoriteteve tuaja, ne do të kthehemi sërish, duam ta njohim më tepër vendin tuaj. Kemi njohur shumë njerëz të mirë këtu. Shoferi dhe guida vendosën jetën e tyre në rrezik për të shpëtuar tonën, kështu që ajo që mund të them është vetëm ‘faleminderit’, tha spanjolli, të cilit ju sulmua familja. /tesheshi.com/
