Prokuroria e Maqedonisë ka rikualifikuar veprat penale në lidhje me dhunën e 27 prillit në parlamentin e Maqedonisë dhe pritet ta vendosë tek akuzat e “krimit të organizuar”.
Sipas këtij kualifikimi, nuk hetohen vetëm ata që ekzekutuan dhunën por në radhë të parë organizatorët dhe urdhëruesit e saj.
Pra në kuadrim e hetimit të krimit të organizuar hetohet banda me të gjithë komponentët e saj.
Këtë e bëri të ditur Prokuroria Themelore Publike në Shkup e cila i ka kërkuar ndihmë Prokurorisë për krim të organizuar.
“Prokuroria Themelore Publike ka konstatuar se në lidhje me ngjarjet që po i hetojmë nga të cilat kanë dalë vepra penale, në këtë fazë është e nevojshme përfshirja e Prokurorisë për krim të organizuar dhe korrupsion, për shkak se një pjesë e veprimeve të ndërmarra nga personat e përfshirë në këtë ngjarje janë në kompetencë e Prokurorisë për krim të organizuar”, bëri të ditur për mediat maqedonase një zëdhënës nga Prokuroria Publike.
Sipas kësaj skeme, bëhet e ditur se do të nisë dhe hetimi ndaj dy deputetëve të VMRO-DPMNE-së, Kërsto Mukoski dhe Sashe Vasilevski, të cilët nga kamerat e sigurisë vërehen duke hapur dyert e Kuvendit për protestuesit e dhunshëm.
Prokuroria ka theksuar se deputetët e lartpërmendur do të hetohen për krim të organizuar.
Nga verifikimi i materialit të siguruar, Prokuroria ka dëshmuar se ekziston bashkëveprim i disa personave të dyshuar përgjatë gjitha zhvillimeve më 27 prill brenda, por edhe jashtë hapësirave të Kuvendi.
Për zhvillimet e 27 prillit në Kuvend, Prokuroria Publike procedoi nëntë padi penale për pjesëmarrje në turmë.
Të gjithë të dyshuarit u dënuan vetëm me kusht. Vetëm ndaj dy të dyshuarve është ngritur padi nën dyshimet se kanë kryer veprën penale “tentim për vrasje”, ndaj kreut të LR PDSH-së Zijadin Sela.
Dy të dyshuarit, Kire dhe Cane Gjorgjievski ndodhen në paraburgim që prej fundit të muajit të kaluar. /tesheshi.com/
