Këtë të enjte, Dhoma e Përfaqësuesve të Kongresit Amerikan ka miratuar legjislacionin që forcon rrjetën e sigurisë për refugjatët sirianë dhe irakianë që duan të hyjnë në SHBA dhe pezullon programin e presidentit Obama për të pranuar 10.000 prej tyre në vitin e ardhshëm.
Me gjithë kërcënimin për një veto nga Shtëpia e Bardhë, projektligji është aprovuar me 289 vota pro e 137 kundër. Për të kanë votuar dhe një numër demokratësh.
Kufizimet që parashikon ky legjislacion do të pezullojnë hyrjen për një kohë të pacaktuar të refugjatëve sirianë dhe irakianë në SHBA.
Pas sulmeve në Paris, republikanët amerikanë kanë kërkuar kufizime më të mëdha për hyrjen e refugjatëve në vend, ndërsa pjesa më e madhe e demokratëve, e veçanërisht presidenti Obama, i kanë qëndruar fort idesë se vendi i tyre nuk duhet ta braktisë traditën e pranimit të refugjatëve.
Masat ligjore të miratuara në Dhomën e Përfaqësuesve duhet të kalojnë më së pari në Senat, për t’iu përcjellë më pas presidentit Obama, i cili ka kërcënuar se nuk do ta japë pëlqimin përfundimtar për to. /tesheshi.com/
