Gjithsej 503,89 hektarë me 2.611.143 fidane do të pyllëzohen të enjten me aksionin e 17-të: “Dita e drurit-mbille të ardhmen tënde!” në Maqedoni.
Ashtu siç informon Ministria e Bujqësisë, Pylltarisë dhe Ekonomisë së Ujërave (MBPEU), aksioni do të zbatohet në 60 lokacione në 30 komuna kadastre, ndërsa për pyllëzim do të përdoren pisha e bardhë dhe e zezë, akacie, frashër, panjë, dushk, gështenjë e butë, dardhë e egër, arrë e zezë etj.
Për nevojat e BNJVL-së dhe veçmas për individët e vetëqeverisjes lokale janë siguruar 1.350.568 fidane, prej të cilave 1.000.568 për Shkupin; pjesët urbane të komunave dhe në pjesët anësore të unazës së kryeqytetit; 150.000 për Manastirin prej të cilave 200 për pjesën urbane të qytetit; 100.000 për Tetovën prej të cilave 100 për pjesën urbane; si dhe 100.000 për Kërçovën prej të cilave 100 për pjesën urbane të qytetit.
Sipas MBPEU-së, plotësisht nga 2.000 lule landra (gjithsej 4.000) do të mbillen pranë autostradës Demir Kapi-Smokvicë dhe në komunën e Dojranit, ndërsa janë siguruar edhe 300 fidane dekoruese prej të cilave 150 (më të larta për 130 centimetra) për Shoqatën e qytetarëve “Dita e drurit-mbille të ardhmen tënde!”.
Në organizim të aksionit përveç Ministrisë, janë përfshirë edhe disa ndërmarrje dhe institcione shtetërore .
Aksioni “Dita e drurit-mbille të ardhmen tënde” filloi në vitin 2008 dhe në katër vitet e para, deri në vitin 2011, është zbatuar në dy stinë – pranverë dhe vjeshtë. Në pesë vitet e fundit, sërish, pyllëzimi bëhet vetëm në vjeshtë.
Në 16 aksionet e deritanishme janë pyllëzuar pothuajse 13.000 hektarë me mbi 35 milionë fidane. Më i mirë ishte efekti në vitin 2009 kur në dy aksione pothuajse në 4.000 hektarë ishin mbjellë më shumë se 7.900.000 fidane.
Kjo që ndodh në Maqedoni, u kujton shqiptarëve të Shqipërisë, sidomos brezit mbi 35 vjeç, të ashtëquajturin “Dhjetori, muaji i pyllëzimit”, që aplikohej gjatë ish-sistemit komunsit. Në katër të dielat e dhjetorit, organizoheshin aksione masive për mbjellje fidanesh, në ato zona ku “urdhëronte partia” dhe “kishte nevojë atdheu”.
M. Krasniqi – /tesheshi.com/
