Një ofensivë e re e forcave të regjimit sirian, si dhe rinisja e sulmeve ajrore pas një pauze trejavore, u kanë marrë jetën dhjetëra personave në lindje të Halepit.
Nga çfarë raporton Al Jazeera nëpërmjet burimeve të veta, më së paku 84 persona janë vrarë dhe dhjetëra të tjerë janë plagosur gjatë dy ditëve të fundit.
“Helikopterët nuk kanë pushuar për një moment të vetëm,” i ka deklarur agjencisë Reuters një pjesëtar i Mbrojtjes Civile Siriane.
“Një nga zonat më të goditura është lagjja esh-Shaar, ku janë hedhur së paku 18 bomba fuçi, njëra prej të cilave pranë një shkolle dhe një spitali fëmijësh,” raporton një korrespondent i Al Jazeera-s.
Një shoqatë mjekësh flet për goditjen e bankës së gjakut gjatë sulmeve të së mërkurës, si dhe të një spitali fëmijësh.
Rinisja e sulmeve ajrore të forcave qeveritare siriane mbi pjesën e rrethuar lindore të Halepit përkon me deklarimin nga Rusia të një operacioni në shkallë të gjerë kundër objektivave opozitare në veri të Sirisë dhe në Homs.
Rusët kanë mohuar që të kenë marrë pjesë në bombardimet e fundit mbi Halep, duke pretenduar se i përmbahen një moratoriumi mbi sulmet ajrore në këtë qytet.
Halepi vijon të mbetet qendra e luftimeve të konfliktit të gjatë sirian. Një pikë kyçe në hartën siriane, një pjesë e qytetit është në duart e kryengritësve, prej kohësh të rrethuar. /tesheshi.com/
