Protesta e djeshme në Tel-Aviv e hebrenjve izraelitë me origjinë etiopiane u kthye në një përplasje të dhunshme me policinë izraelite, gjatë së cilës mbetën të plagosur më së paku 56 punonjës të ruajtjes së rendit dhe 12 protestues, e 43 prej këtyre të fundit u arrestuan.
Kjo ishte një prej protestave më të dhunshme që ka parë Tel-Avivi në vitet e fundit, në të cilën policia përdori gaz lotsjellës për shpërndarjen e manifestuesve.
Protestuesit po ngrinin zërin dje ndaj brutalitetit policor dhe racizmit, duke marrë shkas nga dhuna e ushtruar ndaj një rekruti izraelit me origjinë etiopiane javën e shkuar nga policia izraelite. Për atë ngjarje janë pezulluar tashmë dy policë, por zemërimi i hebrenjve me ngjyrë nuk duket të ketë të ndalur.
Demonstruesit përmbysën një makinë policie dhe hodhën gurë e shishe drejt forcave policore në sheshin Rabin, në zemër të kryeqendrës tregtare të Izraelit.
Izraelitët etiopianë kanë pretenduar prej kohësh se janë diskriminuar për shkak të ngjyrës së tyre. Më tepër se gjysma e tyre jetojnë në varfëri, dhe po vetëm aq arrijnë ta mbarojnë shkollën e mesme.
Protesta e djeshme pasoi atë të së enjtes në Jerusalem, ku mbetën të plagosur 13 persona.
