Tensionet mes Jemin Gjanës dhe Valbona Mezinit nuk ishte i vetmi moment i tensioneve në mbledhjen e kryesisë së PD-së. Sikundër raportohet, Jamarbër Malltezi, dhëndrri i ish-kryeministrit Sali Berisha, ka artikuluar një sërë pakënaqësish dhe kritikash në drejtim të Lulzim Bashës.
Burimet shprehen se Malltezi duke iu drejtuar kreut të PD-së i ka thënë se demokratët janë të demotivuar. Madje edhe në lidhje me zgjedhjet e 25 qershorit, ai ka thënë se PD nuk denoncoi vjedhjen e votës, madje as e dokumentoi atë.
Ndërkohë, mësohet se Basha ka kërkuar që secili nga anëtarët e forumeve të PD-së të flasë me fakte dhe prova, duke shtuar se në të kundërt çdo akuzë që hidhet nuk i shërben PD dhe çon ujë në mullirin e Edi Ramës.
Sikundër raportohet, mbledhja e kryesisë ishte thirrur për nisjen e proçesit të analizës për zgjedhjet e 25 qershorit, por edhe për ndryshimet statutore.
Por duket se kritikët dhe kundërshtarët e Bashës në PD nuk mund të gëlltisin zgjedhjet e 22 korrikut, ku Basha u rikonfirmua kryetar i PD-së, në një garë përballë Eduart Selamit.
Duket se mesazhi i dhënë nga Basha në fillim të mbledhjes së kryesisë, i cili ka folur për bashkim, nuk ka dhënë rezultate. Kjo për faktin se palët janë të ndara dhe vështirë që grupimet brenda PD të pranojnë njëri-tjetrin nëse nuk ka një tolerancë maksimale. /tesheshi.com/
