Jared Kushner, dhëndri i Donald Trump-it, është i përfshirë në hetimin e FBI-së për ndërhyrjen e mundshme ruse në zgjedhjet presidenciale të një viti më parë.
Kjo është ajo çka bëjnë të ditur mjetet amerikane të informimit, me raportimet që thonë se hetuesit besojnë se ai mund të ketë informacion përkatës, por se nuk është i dyshuar domosdoshmërisht për krim.
Në The Washington Post shkruhet se, ndonëse është e paqartë nëse Kushner-i është fokusi kryesor i hetimit, ai është nën hetim për ndërveprimin e tij të gjerë me zyrtarët rusë.
Dhëndri, e njëkohësisht këshilltari i Trump-it, ka patur në dhjetorin e shkuar takime me ambasadorin rus në SHBA, si dhe me një bankier nga Moska.
Avokati i Kushner-it ka lënë të kuptohet se klienti i tij është i gatshëm të bashkëpunojë me çdo lloj hetimi në këtë aspekt.
Rusia e ka mohur në mënyrë të përsëritur çdo ndërhyrje në zgjedhjet presidenciale të fituara nga Donald Trump. /tesheshi.com/
