Kompania amerikane Affinity Partners, e cila zotërohet nga Jared Kushner, dhëndri i ish-presidentit Trump, është në diskutime të avancuara për tre investime në zhvillimin e pronave në Ballkan, që sipas Bloomberg që mund të kalojnë vlerën e një miliard dollarëve.
Dhe në tre, dy prej tyre janë në Shqipëri, më saktë në Sazan dhe Zvërnec, ndërsa tjetra në Serbi.
Firma e kapitalit privat me bazë në Majami planifikon të transformojë ishullin e Sazanit, një bazë ushtarake në kohën e komunizmit, në një komunitet luksoz eko-resort të markës Aman, tha Kushner në një intervistë me Bloomberg Neës.
Gjithashtu, Affinity kërkon të zhvillojë dhe Zvërnecin, një rajon bregdetar me më shumë se tre milje plazhe me rërë të bardhë të thellë. Firma planifikon të ndërtojë disa resorte në zonë, me afro 10,000 njësi vilash dhe dhoma hoteli.
“Ishulli i Sazanit është një nga vijat bregdetare më të paprekura dhe unike që kam parë kudo në botë,” tha Kushner.
Në artikullin e Bloomberg janë publikuar dhe foto nga projekti i Sazanit që paraqet vila luksoze në pjesën shkëmbore të ishullit, si dhe një qendër SPA po mbi shkëmb, me pamje nga deti, të hartuara nga studio Genesis.
Kujtojmë se Kushner shërbeu si këshilltar i lartë i Shtëpisë së Bardhë për Lindjen e Mesme gjatë qeverisjes së vjehrrit të tij. Por pasi Trump u largua nga Presidenca amerikane, ai krijoi kompaninë Affinity, e cila tani ka asete prej 3.1 miliardë dollarësh.
Firma mbështetet nga investitorë nga shtete të Lindjes së Mesme, duke përfshirë rreth dy miliardë dollarë nga Fondi i Investimeve Publike të Arabisë Saudite. Ai po shikon gjithashtu mundësi për të investuar në energjinë e rinovueshme, qendrat e të dhënave dhe inteligjencën artificiale.
Kushner luajti një rol kryesor në Marrëveshjet e Abrahamit që normalizuan marrëdhëniet midis Izraelit dhe disa kombeve arabe në vitin 2020. Ai ka pohuar se nuk do t’i bashkohet administratës së Trump nëse kandidati pretendent republikan fiton zgjedhjet presidenciale në nëntor, sipas Bloomberg.
