Bashkimi Evropian ka reaguar pas bllokimit të rrugëve nga qytetarët në Prishtinë, Gjilan, Shtërpcë, Mitrovicë dhe Rahovec, në shenjë proteste ndaj ardhjes së një delegacioni serb, të cilët kanë paralajmëruar se do të marrin pjesë në një tubim elektoral në Leposaviq për zgjedhjet presidenciale në Serbi.
Zëdhënësja e BE-së, Maja Kocijançiç, përmes një deklerate u ka bërë thirrje autoriteteve kosovare që t’u krijojë kushte atyre që duan të marrin pjesë në tubimet parazgjedhore (të Serbisë) në pjesën veriore të Kosovës,
“Me kujdes po ndjek situatën në veri të Kosovës në lidhje me vizitat e politikanëve serbë në prag të zgjedhjeve presidenciale që do të mbahen të dielën në Serbi.
Kemi marrë raporte për bllokim rrugësh me qëllim të pengimit të njerëzve që sot të marrin pjesë në tubimet e organizuara në veri të Kosovës. BE u bën thirrje autoriteteve në Kosovë t’u sigurojë kushte atyre njerëzve që duan të marrin pjesë në ato tubime dhe që këtë mund ta bëjnë. Mbështesim vizitat e tilla të planifikuara sipas marrëveshjeve të harmonizuara gjatë dialogut të ndërmjetësuar nga Be”, thekson Kocijançiç në komunikatë.
Ajo më tej shton se OSBE duhet të ndihmojë në grumbullimin e votave në Kosovë për zgjedhjet presidenciale (të Serbisë) në bazë të praktikës së vendosur gjatë zgjedhjeve të kaluara, në përputhje me marrëveshjet e arritura në kuadër të dialogut.
Thaçi: Bllokimi i rrugëve të Kosovës është bllokim i rrugës drejt botës
Ndaj bllokimit të rrugëve nga qytetarëtka reaguar edhe presidenti Thaçi duke e quajtur një veprim të tillë tërësisht të papranueshëm, pasi shton se liria e lëvizjes, liria e tubimit, liria e mendimit politik dhe liria e shprehjes janë të garantuara me Kushtetutën dhe me ligjet e Kosovës.
“Këto vlejnë për çdo qytetar të Kosovës dhe askush nuk do të lejohet që t’i cenojë këto të drejta, pa marrë parasysh dallimet në bindje e qëndrime”, ka thënë Thaçi, i cili ka shkruar se nga bllokimi i rrugëve përfitojnë ata që nuk ia duan të mirën Kosovës.
“Nga logjika e bllokimit të rrugëve, sikurse ndodhi sot në disa qytete të Kosovës, më së shumti përfitojnë ata që nuk ia duan të mirën shtetit tonë. Institucionet shtetërore duhet ta garantojnë mbrojtjen e këtyre lirive për secilin qytetar”, ka shkruar Thaçi në Facebook.
Kutjojmë se për vizitë në Leposaviq sot do vije Marko Gjuriq, pasi kryeministri Aleksandar Vuçiç ka refuzuar të vije pasi i janë vënë disa kushte nga qeveria e Kosovës. /tesheshi.com/
