Një javë e trishtë ka qenë kjo për Barcelonën, që pas humbjes shokuese në mesjavë, të mërkurën, ndaj Selta Vigos, në fushën e kësaj të fundit, do të duhet të përballojnë dhe një fatkeqësi tjetër, dëmtimin e Lionel Messit.
Ndeshja e së shtunës ndaj Las Palmasit, që pritej të kalohej pa probleme për shkak të nivelit modest të kundërshtarit, ka rezultuar fatale për argjentinasin, yllin e skuadrës katalanase.
Një goditje në gju, në minutën e tretë, në përplasjen me kundërshtarin Pedro Bigas, do të durohej vetëm për pak kohë nga Messi, i cili iu dorëzua dhimbjeve më pas, për t’u zëvendësuar në minutën e dhjetë nga Munir El Haddadi.
Messi u dërgua në spital për një kontroll mjekësor më të hollësishëm, çka u pasua më vonë nga një deklaratë e klubit të Barcelonës se ai mund të mungojë për dy muaj për shkak të një këputjeje ligamenti.
Dëmtimi i Messit pason atë të mesfushorit Rafinja, i cili është thuajse e sigurtë se nuk do të luajë më gjatë këtij sezoni.
Situatën e vështirë të Barcelonës e rëndon akoma më tepër pamundësia për të aktivizuar blerjen e saj më të re, turkun Arda Turan, e kjo për shkak të një dënimi të imponuar klubit.
Katalanasit fituan mbrëmë 2-1 me Las Palmasin, me dy gola të uruguajanit Luis Suarez, ndërsa Nejmari humbi një 11-metërsh në pjesën e dytë. /tesheshi.com/
