Bashkimi Europian dhe SHBA i kanë dorëzuar Beogradit një ultimatum të vërtetë politik, ku i kërkon që të marrë vendimin final për të mos i dhënë statusin e diplomatit, punonjësve të Qendrës Humanitare Serbo-Ruse në Nish, që dyshohet se është qendra e spiunazhit të Moskës në rajon.
Këtë e ka bërë të ditur gazeta serbe Veçernie Novosti, në një shkrim të sajin, ku i referohet burimeve të rëndësishme diplomatike të Brukselit dhe Uashingtonit.
BE në mënyrë të qartë ka bërë të ditur se nuk do të hapë kapitullin e 31 të Librit të Negociatave për anëtarësim të Serbisë, nëse kjo e fundit nuk vendos shpejt.
Serbia ka hyrë në një fazë të avancuar drejt integrimit në BE, pasi ka hapur negociatat.
Igor Novakoviç, koordinatori i BE-së për grupin e punës me Serbinë tha se “se nuk ka asnjë problem për Perëndimin nëse rusët e Nishit marrin statusin e diplomatit, por nëse ndodh kjo ajo qendër e Nishit do të jetë një territori rus brenda një vendi që synon të bëhet anëtar i BE-së.
Vendet Balltike dhe Polonia, kanë kundërshtuar fort në BE afrimin e Serbisë, pasi sipas tyre Beogradi është një aleat shumë i afërt me Rusinë.
Pas shkrimit të Veçernie Novostit, ka reaguar menjëherë “Qendra Humanitare në Nish”, e cila thekson në një komunikatë se “akreditimi i statusit politik të punonjësve të qendrës është kompetencë e plotë e Beogradit dhe Moskës dhe asnjë vendi tjetër”.
Senatori Amerikan, Ron Johnson, që është kryetari i Nënkomitetit të Senatit për Bashkëpunimin në Europë, vizitoi Beogradin dhe pas një takimi me presidentin serb, Aleksandër Vuçiç, deklaroi në konferencën e përbashkët për shtyp se “kam kërkuar që Qendrës ruse të Nishit të mos u jepet statusi diplomatik”.
“Me Rusinë duhet të ishim një rival miqësor, por siç shkuan gjërat Moska është bërë një armik i yni”, tha senatori. Ron Johnson i cili shtoi se SHBA kërkon të jetë një mik dhe jo rival i Rusisë.
“Ndaj vendimi për këtë është në duart e Vladimir Putin”, deklaroi politikani i rëndësishëm i Partisë Republikane, nga shteti i Wisconcini, që ishte edhe një bastion i Trump në zgjedhjet presidenciale të nëntorit të vitit të kaluar. /tesheshi.com/
