Garë spektakolare në Shangai!
Përplasje, goma të plasura, parakalime pa fund, ndërrime gomash pa fund, makinë sigurie në pistë… Gjithçka për ta bërë të mrekullueshme një garë të Formula 1-shit.
Dhe fituesi është i njëjtë. Si në Australi, në Bahrejn, ashtu dhe në Kinë. Nico, Nico, Nico! Rosberg i ka fituar tanimë tre garat e para të këtij sezoni, duke kryesuar kampionatin me pikë të plota, 75, e duke lënë në hije britanikun Hamilton.
Gara e Shangait ka nisur me një përplasje të pavullnetshme ndërmjet dy makinave Ferrari, për të vijuar me dëmtimin e makinës së Hamilton-it. Një plasje gome e mëpastajme e makinës Red Bull të australianit Ricciardo i ka riturbulluar ujërat.
Për të ardhur te futja e makinës së sigurisë, që i bën zero diferencat. Me sprintin e mëpastajmë të Rosberg-ut, që piloton pa u ngacmuar nga askush. Ferrari i Vettel-it çan përpara, siç bëjnë dy makinat Red Bull.
Një ditë e keqe për Hamilton-in, që nuk ia del në pjesën e fundit të garës të parakalojë Massa-n e Williams-it, duke e paguar shtrenjtë pafuqinë e çuditshme të makinës së tij. Gjithsesi, britaniku i minimizon humbjet, me një vend të shtatë ngushëllues pas nisjes nga fundi i makinave.
Red Bull-i ka dhënë shenja të forta kthimi, me Kvyat që e mbyll garën i treti, e Ricciardo i katërti. Ndërsa vendi i dytë është për Ferrari-n e një tjetër gjermani, të Sebastian Vettel-it.
Peripeci të jashtëzakonshme për Raikkonen-in, që e mbyll garën i pesti.
Rosberg, Vettel, Kvyat, Ricciardo, Raikkonen, Massa, Hamilton, Verstappen, Sainz dhe Bottas. Këta janë dhjetë pilotët që e mbyllën garën në dhjetë vendet e para.
Rosberg, Hamilton e Ricciardo kryesojnë klasifikimin e përgjithshëm të pilotëve, përkatësisht me 75, 39 e 36 pikë.
Në renditjen e konstruktorëve, Mercedes-i ka 114 pikë, me Ferrari-n në vend të dytë me 61 pikë, kurse Red Bull-i i vendit të tretë ka vetëm katër pikë më pak.
Gara e katërt sezonale do të jetë ajo e Rusisë, më 1 maj. /tesheshi.com/
