Edi Rama ka qenë i vetmi politikan shqiptar që ka artikuluar të zezën e lojrave të fatit, përfshirë dhe llotot, ato të sportit, një prej grangrenave të sotme të shoqërisë shqiptare. Por si për shumë vizione të shpalosura, edhe tek ky ka një dështim të dukshëm. Si në rastin e kanabisit, dhe tek bixhozi ka një mospërputhje të frikshme mes fjalëve dhe veprave. Më shumë se katër vite qeverisje, dhe mjafton të shihni lulëzimin e lotove dhe kazioneve, për të kuptuar se sa pak ose aspak rilindje ka patur aty ku realisht duhej të kishte…
Riardhja dje në axhendën e Komisionit Parlamentar të Veprimtarisë Prodhuese e ligjit për Lojrat e Fatit, ishte pikërisht dëshmia më institucionale sesi kjo mazhorancë ka shkelur një nga premtimet më të rëndësishme të marra në vitin 2013.
“Shkulja nga rrënjët e kumarit”, kjo e keqe që ka zaptuar mendjet por edhe shpirtërat e një pjesë të madhe të shoqërisë jo vetëm mazhkullore, u lançua nga Edi Rama thuajse paralelisht me Lazaratin, duke u cilësuar si një aksionet më të mëdha moralë të kësaj mazhorance.
“Fundi i marrëzisë” u quajt operacioni i cili u ndërmor në të gjithë vendin ku u premtua largimi i kazinove pranë shkollave dhe vendeve ku rinia përgjithësisht kalon kohën e lirë.
Në mënyrë të rrufeshme u mbyllën shumë kazino, si disa të tjera që i mbanin të fshehura makineritë e ruletave ruse u kontrolluan në themel.
Por vrulli i këtij operacioni nuk zgjati as gjashtë muaj, dhe si për inerci ndodhi pas një përplasje të ish-kreut të lojrave të fatit me kryetarin e atëhershëm të Komisionit të Ligjeve, sot Ministër i Brendshëm, Fatmir Xhafa, ku ju përmend qenia e një familjari të tij si operator në këtë sektor para-grirrës nga hajvanëria njerëzore.
Pikërisht në fundin e vitit 2015, lobi i lojrave të fatit u dynd drejt parlamentarëve të mazhorancës, duke lobuar fuqishëm, ku u arrit që të hiqen nga drafti fillestar thuajse 30% të ndalesave të forta të qeverisë.
U tha se do të hiqen kazinotë nga qendrat e qyteteve, që do të vendosen në vende të caktuara në periferi, por në fakt përveç disa mbylljeve, asgjë nuk ndodhi.
Edhe sot e kësaj dite pikat e lojrave të fatit që kanë hapur në Tiranë që nga mesi i viteve ‘90 i kemi të instaluara në zemrën e kryeqytetit shqiptar si për të sfiduar çdo njeri që mendon se ata janë kthyer në një kërcënim real për të prishur ndërgjegjet e fëmijëve, në këtë botë ku fitimi i shpejtë apo zilia janë “mbretërit” reale të mendjes njerëzore.
Të ardhur nga Bullgaria në fillim të viteve ‘90, lojrat e fatit ishin “mbrekullia” e vërtetë e kapitalizmit shqiptar, sa edhe Presidenti i atëhershëm Sali Berisha bëri xhiron e botës me një foto ku po englendisej në një makineri lojrash fati.
E në fakt siç ndodhi më pas kjo nuk përbënte fare çudi, pasi e tillë u bë politika shqiptare, një ruletë e madhe ruse ku mashtrimi, bllofi, shantazhi, u bënë virtytet e Shqipërisë së re postokuniste, duke tronditur në themel shoqërinë që tashmë është kthyer në një turmë konsumiste që po humb dita ditës çdo vlerë njerëzore.
Edi Rama deklaroi katër vjet më parë që do të fshinte jo vetëm kazinotë por edhe llotot që gjithashtu kanë infektuar një pjesë të madhe të shoqërisë, por lobi i lojrave të fatit që përbëhet nga një xhiro miliardash qëlloi më i fortë.
Sot nuk janë operatorë të vegjël ata që veprojnë në këtë sektor, por kompani të mëdha që janë partner me qeverinë në shumë ndërmarrje publike.
Megjithatë ligji i ri i paraqitur në Kuvend, zbaton pikërisht premtimin e Ramës në vitin 2013, largimin e lojrave të fatit nga qyteti.
Sipas ligjit, deri më 31 janar 2017 kazinotë do të duhet të zhvendosen në periferi të qyteteve.
Komisioni Parlamentar i Ligjeve, vitin e kaluar miratoi shtyrjen e afatit për pronarët e kazinove dhe lojrave të fatit edhe me 1 vit, pasi në draftin e qeverisë parashikohej mbyllja e tyre në qytet në 31 janar të vitit 2016. Lobimi i fuqishëm i lojrave të fatit kanë dyndur sërish Komisionet e Parlamenteve për të arritur një shtyrje të re. A do të arrijnë sërish? /tesheshi.com/
