Vetëm një muaj pasi i dhanë të drejtë me votën e tyre Emmanuel Macron-it që të bëhet presidenti i ri i vendit, francezët votojnë përsëri sot, këtë herë për të zgjedhur anëtarët e Asamblesë Kombëtare.
Të drejtën e votës e kanë më shumë se 47 milionë njerëz në këto zgjedhje që zhvillohen me dy raunde, i pari sot dhe tjetri pas një jave.
Qendrat e votimit janë hapur në 08:00, për t’u mbyllur në qytetet më të mëdha në 20:00, ndërkohë që më tepër se 50.000 forca policore kanë detyrën e ruajtjes së qetësisë në vend.
Një numër i përgjithshëm prej 7.882 kandidatësh janë në garë për 577 vende në parlament. Shumë figura të reja pritet të ulen në karriget e Asamblesë Kombëtare, teksa mbi 200 anëtarë të parlamentit të tanishëm nuk kanë zgjedhur të rikandidojnë.
“La République En Marche!”, organizmi politik i presidentit Macron, sugjerohet se mund të mbledhë rreth 30 për qind të votave, sipas disa anketimeve, e të kërkojë më pas, në raundin e dytë, të sigurojë një shumicë absolute.
Duhet ditur se që nga viti 2002, presidentët e rinj kanë mundur të sigurojnë një shumicë në parlamentin pasues francez.
Jacques Chirac në 2002-shin, Nicolas Sarkozy në 2007-n dhe Francois Hollande në 2012-n ia kanë dalë të sigurojnë një shumicë mbështetëse në Asamblenë Kombëtare, por çfarë ndryshonte tek ta nga Macron-i ishte ardhja nga parti me histori të gjatë në jetën politike franceze. /tesheshi.com/
