Këtë herë bëhet fjalë për ekipin e futbollit të qytetit të Korçës, skuadrën që ka shkruar historinë në vitet e fundit në futbollin shqiptar.
Me sa duket, ka trokitur vjeshta edhe për Skënderbeun, që përfundimisht do të mbetet jashtë futbollit europian për këtë sezon. Veç kësaj, telashet mund të shtohen pas ngritjes së zërit nga kundërshtarët e drejtpërdrejtë për titull në Superligë.
Gjykata e Arbitrazhit Sportiv në Lozanë e ka lënë në fuqi vendimin e UEFA-s për një dënim njëvjeçar të Skënderbeut, duke mos e lejuar që të marrë pjesë në eliminatoret e Champions League-s. I dyshuar për trukime, Skënderbeu nuk do të mund të luajë në turin e dytë eliminator të turneut më me prestigj për klube në Europë.
Ankesa e Skënderbeut nuk është çmuar si e drejtë nga e njëjta gjykatë që do të jepte një vendim në favor të përfaqësueses shqiptare muaj të shkuar.
Por nuk duket se do të mbarojë me kaq për Skënderbeun. Klubi i Partizanit ka dalë me një deklaratë këtë pasdite, ku lë të kuptohet se kërkon një dënim të korçarëve dhe në nivel kombëtar.
“Pas zyrtarizimit të dënimit të KF Skënderbeut për paracaktim të rezultateve, referuar vendimit të sotëm të CAS-it, klubi i Partizanit pret një qëndrim nga ana e FSHF-së, duke parë edhe reagimet që kanë mbajtur federata të tjera demokratike të Europës në raste të ngjashme,” thuhet në këtë deklaratë.
Largimi i një pjese të lojtarëve, i trajnerit Josa, dënimi i CAS-it, dënimi që mund të vijë nga FSHF-ja, të gjitha këto paralajmërojnë një sezon të vështirë për Skënderbeun, ndryshe atyre të viteve të shkuara, të përfunduara lavdishëm. /tesheshi.com/
