Flota detare ruse filloi një stërvitje ushtarake në Detin e Zi të mërkurën, përpara ardhjes së pritur të anijeve luftarake amerikane në zonë, raportojnë agjencitë ruse të lajmeve.
Ushtrimi përfshin anije luftarake ruse nga Flota e Detit të Zi me bazë në Krime, helikopterë dhe aeroplanë, raporton Reuters.
Si pjesë e ushtrimeve do të praktikohen të shtënat në objektivat ajrorë dhe tokësorë.
Dy anije luftarake amerikane do të mbërrijnë në Detin e Zi këtë javë, ndërsa Uashingtoni dhe NATO shprehin shqetësimin për një rritje të numrit të forcave ruse në kufirin me Ukrainën dhe Krimenë.
Prania e anijeve amerikane në atë det nuk është e pazakontë.
“Nuk është asgjë e re,” tha zëdhënësi i Pentagonit John Kirby javën e kaluar.
Por Moska ka paralajmëruar Shtetet e Bashkuara të mos i sjellin anijet e saj më afër Krimesë “për të mirën e tyre”, duke e quajtur dërgimin e tyre në Detin e Zi një provokim që synon të testojë nervat e Rusisë, raporton Reuters.
Nga ana tjetër, forcat e armatosura ukrainase praktikuan një sulm tankesh dhe këmbësorie afër kufirit me Krimenë të mërkurën, sipas një deklarate nga komanda e ushtrisë ukrainase, raporton Reuters.
Ushtria ukrainase tha se kishte vendosur tanke dhe artileri për të praktikuar forcat zmbrapsëse.
Ushtria postoi një video në Facebook, e cila shoqërohet me muzikë rock, që tregon tanket që manovrojnë në formacion dhe ushtarët që gjuajnë artileri.
Ushtrimet erdhën një ditë pasi Presidenti i SHBA Joe Biden foli në telefon me Presidentin rus Vladimir Putin për akumulimin e trupave ruse pranë Ukrainës lindore dhe në Krime. /tesheshi.com/
