E ndërsa politika shqiptare është përfshirë nga debati i nxehtë për Paktin e ri Detar me Greqinë, ku zëra anti-qeveritare hedhin akuza deri për “shitje deti” nga ana e qeverisë shqiptare, interesant, sa dhe ironik, është fakti se ngjashëm po ndodh dhe në politikën e Athinës.
Dora Bakojanis, ish-ministrja e Jashtme në qeverinë Karamanlis e cila firmosi paktin së bashku me Lulzim Bashën-homolog në atë kohë, i ka kërkuar llogari pasaradhësit të saj Kotziasit mbi disa aspekte të marrëveshjes së re të pritshme e negociatave që do i paraprijnë atyre. Madje prej saj, ngjashëm si në Tiranë, ka qenë dhe kërkesa për ta njohur grupin negociator grek.
E në sqarimin e ministrit Kotzias, ka qenë dhe ajo se ëfarë pritet të jetë marrëveshja e re.
“Marrëveshja e re ka të bëjë me 9% të sipërfaqes së detit midis Greqisë dhe Shqipërisë. 1.190 kilometra katrorë i përkasin palës greke nëse zgjeron me 12 milje zonën bregdetare, 1.220 kilometra katrorë i përkasin palës shqiptare, e cila tashmë e ka zgjeruar zonën e saj detare me 12 milje, ndërsa mbetet një pjesë rreth 9% e zonës detare për t’u negociuar. Ajo që duhet të zbulojmë është nëse ka çështje të tjera teknike që duhen zgjidhur”, ka deklaruar ministri i Jashtëm grek. /tesheshi.com/
