Elita 5, grupi i njohur tetovar, 33 vite aktiv, së bashku, pa u ndarë kurrë, ofrojnë njëherësh një rekord që vështira ta ketë ndonjë grup tjetër muzikor në botë, pra përveç jetëgjatësisë, ku ata ngjajnë me Rolling Stones.
Pjesëtarët kanë jetë të rregullt familjare, si dhe sociale gjithashtu, gati me nuanca fetare. Ata s’konsumojnë alkool e larg qoftë ndonjë diçka tjetër.
U pohua kjo nga lideri i grupit Arif Ziberi, njëherësh vokalisti i tij me nam, që, në një lidhje me “Mirëmëngjes” në Euronews Albania, tha se “të gjithë anëtarët e grupit janë familjarë dhe nuk konsumojnë alkool apo substanca të tjera”.
Ai tregoi dhe sekretin e jetëgjatësisë së Elita 5.
“Ne jemi si grup që nga shkolla fillore dhe e mesme bashkë. Secili anëtar i grupit i di ato përgjegjësitë e veta dhe sinqeriteti ndaj njëri-tjetrit dhe dëshira e madhe për muzikë na kanë mbajtur bashkë”, tha ai.
Gjithashtu, Ziberi tregoi respektimin që i është bërë një vendimi të marrë që në fillim të nisjes së karrierës së grupit.
Ai tha se që prej fillimit të karrierës, 33 vite më parë, kanë vendosur që të qëndrojnë larg festivaleve apo konkurimeve të tjera.
“Që nga fillimi i karrierës e kemi pasur këtë qasje. Ne kemi vendosur të mos jemi grupi i festivaleve”, tha Ziberi, gjë që sipas tij u ka sjellë sukses. /tesheshi.com/
