Pas votës së famshme “anti-amerikane” në OKB, Shqipërisë nuk i ka ardhur asnjë sinjal zyrtar nga Uashingtoni për ndonjë ndëshkim të mundshëm politik edhe diplomatik.
Zëri Amerikës, që është media e Departamentit të Shtetit, e që e transmetoi e para votën e Shqipërisë, gjithashtu nuk dha ndonjë sinjal direkt apo indirekt.
Ndërkohë, ditë pas dite mësohen edhe zhvillime të reja të panjohura, si për të plotësuar më shumë panoramën e ndihmuar debatin e ndezur gjithë këto ditë për “tradhëti ndaj Amerikës” apo ndaj Presidentit Trump.
Mësohet se ambasadorja e Shteteve të Bashkuara të Amerikës, Nikki Haley, ka qenë një natë përpara se të niste votimi në OKB, në një eveniment të biznesmenëve nga komuniteti shqiptar në Nju Jork; madje ka mbajtur edhe një fjalë të rastit. Por ajo nuk ka pasur asnjë mesazh se si Shqipëria duhet të votonte në Asamblenë e Përgjithshme të OKB-së.
Në takim, përveç shumë figurave kanë qenë edhe diplomatët shqiptarë në SHBA: ambasadorja në OKB, Besiana Kadare, si dhe ambasadorja e Shqipërisë në Uashington, Floreta Luli Faber.
Ambasadorja Haley ka lidhje të forta me komunitetin shqiptar nga disa lidhje familjare të saj.
Sipas të gjitha gjasave, nëse Uashingtoni do të kishte mesazh ndaj Tiranës, mund ta jepte edhe në takimet me komunitetin shqiptar atje, një pjesë e madhe e të cilit është votues republikan dhe ka votuar për Presidentin Donald Trump.
Po ato ditë në Nju Jork ka qenë edhe Kryeministri Edi Rama, i cili ka zhvilluar një takim po me disa sipërmarrës të komunitetit shqiptar në Nju Jork.
Për këtë takim Rama ka hedhur edhe një foto në faqen e tij në Facebook, por edhe një shënim.
“Në New York me sipërmarrës dhe profesionistë të suksesshëm të komunitetit shqiptar në Amerikë për sfidat në rrugën e ndërtimit të Shqipërisë që duam dhe për të çuar përpara idetë dhe projektet konkrete të bashkëpunimit që zunë fill në Samitin e parë të Diasporës mbajtur një vit më parë në Tiranë”, shkruan Rama.
Bie në sy se pjesëtarë të takimit të Ramës, janë edhe pjesëmarrës në ceremoninë ku mori pjesë ambasadorja e SHBA-së në OKB, e cila për nga rëndësia është e dyta pas Sekretarit të Shtetit.
Madje shpesh, pasi kanë qenë në postin e ambasadorit në OKB. disa diplomatë janë emëruar në krye të DASH si zonja Allbright p.sh, por ka edhe raste të tjerë, që do të thotë se ai takim para votës, mund të kishte një mesazh nëse do të kishte një insistim për të fituar në Asamblenë e Përgjithshme të OKB-së.
Pas një frenezie të madhe në rrjetet sociale për votën e Shqipërisë në OKB lidhur me Jerusalemin, ku mallkohej Rama se ka tradhëtuar SHBA-në, gjendja duket më e ekuilibruar pas riardhjes në debat të emrave dhe ekspertëve që u peshon fjala dhe e njohin më mirë diplomacinë dhe të drejtën ndërkombëtare.
Tashmë, nga pjesa e moderuar e tyre thuhet se varianti më mirë do të ishte abstenimi, ndërkohë që konsultimi i Presidentit me Kryeministrin dhe liderin e opozitës do të qetësonte më shumë situatën.
Pa justifikuar në këtë rast Ramën, a jemi në klimën e konsultimit teksa palët janë futur në llogore, prej të hënës së shkuar kur u zgjodh Kryeprokurori i përkohshëm?
Pra, edhe nëse do bëhej një ftesë për konsultime, kjo vështirë të ndodhte. Deri pa shpërthyer çështja e votës, Kyeprokurori ishte mbi gjithçka. /tesheshi.com/
