Selitë e ambasadave perëndimore kanë marrë informacion nga shërbimet e tyre sekrete që gjatë ditës së sotme në protestën që zhvillohet para Kuvendit do të ketë përplasje dhe tension të madh, madje edhe incidente fatale.
Ambasada Amerikane, në një mesazh drejtuar qytetarëve të saj, u bën thirrje të rrijnë larg zonës së Parlamentit dhe zonës ku zhvillohet mitingu.
“Ju bëjmë thirrje që të keni kujdes pasi një demonstratë paqësore mund të kthehet lehtësisht në një konfrontim social”, shkruan ambasada amerikane duke ju drejtuar qytetarëve të saj.
Shërbimit sekret shqiptar i ka ardhur një informacion që elementë që punojnë për disa shërbime që kërkojnë destabilizim të situatës, mund të përfshihen brenda turmës së përkrahësve të PD-së dhe LSI-së, të cilët do të protestojnë sot nga ora 9.30 përpara parlamentit.
Policia ka ndaluar lëvizjet e mjeteve të rënda nga rruga e Elbasanit, Zogu i Zi, por edhe nga kryeqëzimi i Paskuqanit, pasi mendohet se në kamionë të rëndë do të ngarkohet një pjesë e “municionit” që do të përdoret gjatë protestës.
Një burim në një agjenci ligjzbatuese, bëri të ditur për tesheshi.com se ekziston frika që nervi që opozita iu ka injektuar militantëve për ditën e sotme, por edhe stresi i forcave të policies, mundet të prodhojë incidente shumë të rënda nëse nuk menaxhohet siç duhet.
Partia Demokratike dhe Lëvizja Socialiste vendosën që të zhvillojnë sot një protestë para Kuvendit për të ndaluar zgjedhjen e Kryeprokurorit të përkohshëm.
Detajet, forma, kohëzgjatja dhe metodat mbahen të fshehta për t’i bërë publike vetëm disa minuta para zhvillimit të saj.
Siç mësohet nga burime brenda opozitës, protesta do të kombinohet me dy faza, atë brenda dhe jashtë sallës. Deputetët do të pengojnë procedurën dhe sipas gjasave ka të dhëna që do të tentohet që protestuesit të hyjnë edhe brenda Parlamentit, ku më pas do ta quajnë atë si jo legjitim.
Opozita ka marrë masa që të shmangë edhe murin e fortë të policisë që do të formohet nga forca të shumta blu që pritet të rrethojnë Parlamentin.
Pritet që të zhvillohet konfrontim i fortë fizik me mjete të forta, deri edhe me shishe me benzinë, në mënyrë që të çahet kordoni. Më pas do të tentohet të futet në Parlament.
Degët e PD-së dhe LSI-së kanë mobilizuar masa të madhe njerëzish, e cila sa më e madhe të jetë, aq më shumë krijohen mundësitë për t’u futur në Kuvend.
Nëse ndodh kjo atëherë komisioni i protestës do të kërkojë largimin e qeverisë, duke shtyrë në kalenda zgjedhjen e Kryeprokurorit.
Gjithsesi, shpresohet që kjo të mos ndodh, në kuptimin destruktiv të fjalës. /tesheshi.com/
