Ndërsa Partia Demokratike e Lulzim Bashës përkujtonte 20 shkurtin e vitit 1991, pra rrëzimin e statujës së Enver Hoxhës, në Tiranë kishte mbërritur një tropojan i famshëm i përtej detit.
Bëhet fjalë për Elez Biberajn, ish-drejtuesin jetëgjatë të Zërit të Amerikës në Shqip dhe që tani drejton një nga departamentet më të mëdha të VOA-s, atë të Eurazisë.
Biberaj bëri një xhest të rëndësishëm që u kuptua si një mesazh nga Uashingtoni politik. Ai shtrëngoi duart me Besnik Mustafajn, shkrimtarin e diplomatin që u largua me zhurmë prej PD-së.
Biberaj promvoi tropojanin e “butë” si një politikan që i duhet Shqipërisë. Nuk u pa shumë me vëmendje ai moment, por këto ditë duket se gjërat kanë ecur me shpejtësi.
Njerëzit që u përjashtuan nga Lulzim Basha dhe bënë pak zhurmë pas zgjedhjeve, tashmë duket se kanë marrë vendimin më të madh që pas 2005-s: të ndajnë Partinë Demokratike për të formuar një parti të re të qendrës së djathtë; një precedent si ai i LSI-së së Ilir Metës që ndau PS-në, por nga krahu tjetër.
Astrit Patozi, Ridvan Bode, Jozefina Topalli e Arben Imami, duket se janë figurat kryesore të lëvizjes së re, por që në mënyrë të kujdesshme kanë zgjedhur Besnik Mustafajn si ikonën e tyre politike.
Jo thjesht se zoti Mustafaj është nga Tropoja, por natyrisht edhe sepse është i tillë dhe krijon një alterego thuajse perfekte me liderin historik, Sali Berisha.
Intelektual, verior, aty ku PD ka rrënjët e saj, themelues, kontestator më pas i Berishës dhe një politikan që nuk urrehet majtas.
Astrit Patozi, i cili është nismëtari i kësaj lëvizjeje dhe pritet të jetë një nga krerët e grupit themelues, po lëviz të gjithë motorët për ta bërë këtë pakënaqësi ndaj Lulzim Bashës në një gjenerator politik.
Patozi edhe Bode ka zhvilluar kohët e fundit takime me gazetarë, analistë të njohur për t’i futur në grupin e ri, në mënyrë që të krijohet kështu një aureolë jo-pushtetare siç janë ish-ministrat, por njëkohësisht që kanë krijuar profil publik dhe popullor si kontestues të Edi Ramës. Armand Shkullaku dhe Bledi Koka janë dy nga emrat që pritet të jenë të grupin e ri.
Nuk dihet pozicioni i lideri historik të PD-së, Sali Berisha, por mësohet se ai nuk e ka penguar. Madje njerëz të afërt, familjarë të Doktorit janë përkrahës të zellshëm të grupimit të ri politik.
Partia e re do t’i ngjajë modelit të Zijadin Selës në Maqedoni, i cili i mori Menduh Thaçit partinë, por deri në momentin e fundit u quajt si Lëvizja për Reformimin e PDSH-së. Ajo do të quhet Lëvizja për Shpëtimin e PD-së dhe si e tillë do të mbetet për mjaft kohë.
Partia më e re do të hyjë në zgjedhjet lokale si forcë e re politike alternative me të gjithë, ndaj po i shpejton lëvizjet që të hyjë në territore të rëndësishme për të fituar në zona si Shkodra ku e djathta është e fortë, e për t’u evidentuar në Tiranë me një figurë që ta dobësojë “lali Erin” që përveç të gjithave është kthyer në një personazh filmash viziatimorë, edhe pse është njeriu më i fuqishëm në Shqipëri pas kryeministrit.
Do të vendosë figura të forta intelektuale në Durrës për t’i kundërvënë fenomenit “Gjushi”, i cili natyrisht është drejt perëndimit.
Por më shumë se alternativë qeverisë do të jetë një kërcënim i fortë ndaj PD-zë zyrtare të Lulzim Bashës, e cila po e trajton thjesht si parti ish-ministrash.
Por e rëndësishme është perceptimi. Partia e re, “hero” do të ketë të ndjerin Sokol Olldashi. Po Berisha i cili e mënjanoi Olldashin?
Këto janë dilema që do të zgjidhen në betejën më të afërt elektorale dhe ka gjasa ta zhvendosin atë në një betejë brenda llojit tek e djathta…/tesheshi.com/
