Mësohen prapaskena të tjera në lidhje me bisedën 20 minutëshe ndërmjet Sekretarit Amerikan të Shtetit, Rex Tillerson dhe kryeministrit Edi Rama, javën e shkuar.
Një nga temat e diskutuara, mësohet se kanë qenë pikërisht marrëdhëniet mes Shqipërisë dhe Greqisë dhe në veçanti çështja e mbetur pezull e kufirit detar mes dy vendeve fqinje.
Kufiri detar mes Shqipërisë dhe Greqisë, ka mbetur pezull që kur Gjykata Kushtetuese rrëzoi Marrëveshjen e firmosur në vitin 2009 nga Lulzim Basha dhe Dora Bakojanis, atëherë ministra të jashtëm të dy shteteve respektive.
Çështja që mban ende peng këtë marrëveshje është natyrisht një “hambar”nafte dhe gazi që ndodhet në zonën ndërmjet Ishullit të Korfuzit dhe Ksamilit, apo i ashtuquajturi “Damari i Delvinës””.
SHBA ka marrë përsipër që të jetë një palë negociuese në mënyrë që të mos lërë në Ballkan nyje problematike dhe po i zgjidh ato një nga një për të mos lënë shteg që Rusia të depërtojë me influencën e vet.
Së bashku me çështjen e detit, SHBA po negocion si paketë me Athinën edhe çështjen e futjes së Maqedonisë në NATO, duke mbyllur përfundimisht çështjen e emrit.
Njëjtë po veprohet me Serbinë e Kosovën, duke krijuar kështu kushtet për një Ballkan pa probleme dhe “vrima të zeza”.
Ndërkaq, çështja e naftës që ndodhet në detin Jon, është një nga çështjet që i intereson jo vetëm Shqipërisë dhe Greqisë, por natyrisht edhe Shteteve të Bashkiara të Amerikës, e në veçanti administratës Trump, e cila po luan një rol të zgjeruar për çështjet e energjisë.
Administratat republikane gjithmonë i japin një hov çështjes së naftës dhe gazit në politikën e jashtme, por Donald Trump duket se e ka fokus të rëndësishëm këtë çështje.
Disa nga ministrat më të rëndësishëm të Trump janë drejtues dhe zotërues të gjigandëve të energjisë në SHBA.
Vetë Sekretari i Shtetit Tillerson, ka qenë për një kohë të gjatë drejtuesi më i lartë i Exon Mobile, shumëkombëshes më të madhe të naftës në botë.
Dhe nuk është çudi që pas deklaratës së Edi Ramës në samitin e Stambollit që në Shqipëri fshihet një det me naftë, kompanitë e njohura amerikane të jenë të interesuara për investimet e tyre.
Greqia ka nisur punën për të kërkuar në zonën e saj, fare pranë kufirit me Shqipërinë, ku ka pajtuar një kompani të njohur skandinave.
Qeveria shqiptare pritet të mbyllë brenda vitit pjesën e saj në këtë çështje. Por nisja e punës për të shpuar naftë pa përfunduar marrëveshja detare pritet të shkaktojë një problem të madh mes dy vendeve.
Ndaj edhe Uashingtoni ka marrë përsipër të jetë mediator në këtë çështje.
Ndërkaq, Edi Rama është takuar me Kryeministrin grek Alexis Tsipras, vetëm një muaj para zgjedhjeve të 25 qershorit.
Takimi u zhvillua në samitin e NATO-s në Bruksel, ku si Tsipras, ashtu edhe Rama janë takuar me presidentin e SHBA, Donald Trump.
Rama e Tsipras kanë biseduar veçanërisht për çështjen e marrëveshjes detare, ku kanë rënë dakord që ajo të mbyllet në bazë të së drejtës ndërkombëtare, ku do të përdoret përvoja e shteteve të mëdha.
SHBA pritet të hyjë garant për zgjidhjen, duke gjetur një modus vivendi për të përdorur burimet e naftës dhe gazit.
Qeveria e Alexis Tsipras është afruar prej kohësh me Rusinë e Vladimir Putinit dhe kjo shikohet si alarm i kuq nga Uashingtoni që ka nisur negocimin.
SHBA ishte ajo që bindi Athinën në vitin 2008 për të mos vënë veton kundër Shqipërisë në NATO. Këtë herë do tí kërkojë që të mos e bëjë në BE për të hapur negociatat me Shqipërinë. /tesheshi.com/
