Janë zbardhur detaje nga ajo që deri më tani ka mbetur mister për publikun shqiptar, këndej dhe andej kufirit: projekt-ideja e qeverisë shqiptare mbi një Asosacion të pranueshëm nga dy palët, Prishtina dhe Beogradi.
Report TV thotë se ka siguruar draftin për të cilin Rama bëri me dije opinionin muaj më parë, por pa dhënë detaje se ç’thuhej aty, vetëm duke thënë se jua ka dërguar aktorëve ndërkombëtarë për vlerësim. Më vonë tha se ata e kanë vlerësuar atë.
Si bazë, Rama propozon që statuti i Bashkësisë së Komunave serbe t’i dërgohet për vlerësim Gjykatës Kushtetuese dhe që nuk duhet të zëvendësojë, t’i mbivendoset ose të reduktojë të drejtat e asnjë prej komuniteteve me banim në këto komuna.
Lidhur me funksionimin, parashikon një “strukturë organizative duke përfshirë Asamblenë, Presidentin dhe zv/presidentin, Bordin, grupin këshillues, administratën dhe zyrën e ankesave”.
Sa u përket marrëdhënieve me autoritetet qendrore, Rama sugjeron që kjo bashkësi të mos zëvendësojë apo minojë marrëdhëniet kushtetuese e ligjore mes autoriteteve qendrore dhe lokale në Kosovë.
Po ashtu, sipas tij, dy vitet e para pas nisjes nga puna, bashkësia do të monitorohet nga BE.
Në përfundim të draftit thuhet se ai ka marrë edhe mbështetjen e Gjermanisë, Francës, Italisë dhe SHBA, ndërsa pavarësisht kundërshtive fillestare, edhe Kosova edhe Serbia e kanë cilësuar si një bazë të mirë për normalizimin e marrëdhënieve, siç thuhet nga Report TV. /tesheshi.com/
