Turqia do t’i kërkojë Suedisë dhe Finlandës të ekstradojnë 33 anëtarë të lëvizjes PKK dhe Feto, të cilat i konsideron terroriste, njoftoi të mërkurën ministri i Drejtësisë Bekir Bozdag, transmeton AFP.
Kërkesa vjen një ditë pas nënshkrimit të një memorandumi midis tre vendeve që i hap rrugën Helsinkit dhe Stokholmit drejt anëtarësimit në Organizatën e Traktatit të Atlantikut të Veriut (NATO), të cilin Ankaraja e ka kundërshtuar deri më tani.
“Si pjesë e marrëveshjes së re, ne do t’i kërkojmë Finlandës të ekstradojë gjashtë anëtarë të PKK-së dhe gjashtë anëtarë të Feto-s, dhe Suedisë të ekstradojë dhjetë anëtarë të Feto-s dhe 11 anëtarë të PKK-së”, tha ministri, sipas mediave turke.
Partia e Punëtorëve të Kurdistanit (PKK) është shpallur organizatë terroriste në Turqi, Bashkimin Evropian dhe Shtetet e Bashkuara të Amerikës.
Feto është lëvizja e Fethullah Gulen, një ish-aleat dhe sot kundërshtar i presidentit Rexhep Tajip Erdogan, të cilin ai e fajëson për tentativën për grusht shteti ushtarak në korrik 2016.
Të martën, përpara hapjes së samitit të NATO-s në Madrid, Erdogan u takua për disa orë me homologun finlandez Sauli Niinistö dhe kryeministren suedeze Magdalena Andersson.
Turqia ka bllokuar hyrjen e dy vendeve në NATO, duke i akuzuar për largimin e anëtarëve të dy lëvizjeve.
Në fund të takimit në Madrid u prezantua një memorandum i tre vendeve, i cili hap rrugën për zgjerimin e Aleancës.
“Turqia mori atë që donte,” tha zyra e presidentit turk, duke iu referuar “bashkëpunimit të plotë” të shteteve në luftën kundër terrorizmit. /tesheshi.com/
