Ishte Petrit Vasili që fillimisht serviri shifrën e 100 të plagosurve nga radhët e protestuesve. Dhe më pas zëri opozitar e pati si frazë të sajën bazë “sjelljen brutale të policisë”. Dhe në këtë prirje të dukshme për ta penalizuar ligjin dhe jo atë që e shkel, ngre krye dhe pretendimin se ishte policia ajo që qëlloi me gurë.
E ndërsa njihen vërtet precedentët kur policia e tepron me ushtrim dhune, gjë e cila provokon më pas reagime – raste që vijnë me shumicë dhe nga Perëndimi demokratik – deri më sot nuk ishte dëgjuar që ajo të qëllojë dhe me gurrë ndaj protestuesve.
Zhvillimet e djeshme në Rrugën e Kombit ishin mëse të qarta nga pikëpamja e përçimit mediatik. Nuk kishte qoshe të padukshme me pikëpyetje. Madje dhe varetë në duart e ca prej atyre që iu sulën sporteleve, ishin mjaft të qarta: i kishin marrë me vete në automjete dhe i nxorrën në një çast të caktuar.
Po ashtu, deri më sot nuk ka asnjë të dhënë që të jetë lënduar ndonjë protestues. Pra, pos arsyes së ftohtë dhe normale, dhe nga kjo e dhënë bie pretendimi që policia të ketë qëlluar me gurë.
Është e kuptueshme, ndonëse krejt e paarsyeshme, që opozita të mbajë anën e protestuesve, gjithnjë në rastin kur ata ushtrojnë dhunë. Më e pakta i hap rrugë precedentit. Nesër në pushtet, për çdo rast që nuk do jenë dakort me ty mbi një vendim, ti ke legjitimuar dhunën ndaj…vetes! Por të thuhet se policia ka qëlluar më gurë ndaj protestusve, këtu më pas kalohet tek lajmet e llojit showbiz. /tesheshi.com/
