Dy nga më të zëshmit e koalicionit të fundit qeverisës, Nait Hasani, ish-deputet i PDK-së dhe Bajram Gecaj, zv.ministër në largim i LDK-së më në fund janë bërë të “gjallë” pas dështimit për t’u bërë deputetë.
Hasani thotë se pavarësisht rezultatit të KQZ-së, nuk do të ndalet dhe do të vazhdojë të provojë sërish që të jetë pjesë e legjislaturës tjetër parlamentare.
“Të dashur qytetar, struktura e simpatizant të Partis Demokratike në Kosovë. Ju falenderoj për mbështetjen, përkrahjen tuaj, u jam mirënjohës përhere. Pasi KQZ ka bërë çertifikimin e rezultateve të zgjedhjeve të Qeshorit, unë nuk kam mundur të bëhem deputet me votat e KQZ për disa ditë! Por unë me votën tuaj do të jem aty deputet për mandatin e pestë në Kuvendin e Kosovës. Do jem gjithmonë afër jush, do të vazhdoj të punoj për interesat e shtetit të Kosovës. Zëri im do të dëgjohet edhe më fuqishëm në mbrojtjen e shtetit dhe vlerave të qytetarëve të Kosovës. Ditët e mira për qytetarët e Kosovës do të vijnë”, ka shkruar Hasani.
Ndërsa Gecaj, ish-zv.ministër i Administrimit të Pushtetit Lokal, përmes një postimi në Facebook është shprehur tejet i zhgënjyer që nuk ka arritur të bëhet pjesë e legjislaturës së re parlamentare.
“Është e vërtetë se kam pritur më shumë se kaq, posaçërisht duke pasur parasysh punën, përvojën, profesionalizmin, kredibilitetin, energjinë, sinqeritetin dhe ndershmërinë të cilën e kisha investuar këto dy vite e gjysmë në institucionet e republikës. Kam mbrojt me guximin më të madh intelektual dhe me ndershmërinë më të madhe njerëzore qeverinë dhe kryeministrin për të cilin kam punuar, duke i dalë zot kështu vendimeve të strukturave qendrore të partisë të cilës i përkas tani e njëzeteshtatë vite”, thotë Gecaj.
Ai më tej pohon se me asnjë veprim të tij nuk ka shkelë asnjë nga parimet individuale, njerëzore e profesionale, por me moralin më të lartë dhe me ndershmëri ka kryer të gjitha detyrat dhe obligimet e shumta dhe ndër më të vështirat të cilat i janë besuar gjatë këtij mandati.
“Jam ballafaquar me kundërshtarët, keqbërësit dhe dashakëqijtë pa asnjë hezitim, duke provuar kështu se nuk është mirë të hyhet në asnjë punë me dy mendje por me një mendje të prerë dhe me një dedikim të paluhatshëm. Pa marrë parasysh se ku do të jem dhe çfarë do të bëj në të ardhmen, e padyshimtë është se unë gjithherë dhe kudo do të jem LDK-ist i përbetuar, sepse LDK ka qenë, është dhe besoi fuqishëm që edhe në të ardhmen do të mbesë instrumenti më i mirë politik dhe i pa-konkurrencë për shtyrjen para të proceseve vitale të rëndësisë nacionale me interes të përgjithshëm qytetarë e kombëtarë. Uroi ta ruajmë LDK-në si sytë e ballit”, ka shkruar Gecaj. /tesheshi.com/
