Ka dështuar me sukses takimi mes Edi Ramës dhe Lulzim Bashës. Pas një orë diskutime me dyer të mbyllura dy liderët kanë dalë veç e veç në një konferencë për shtyp ku kanë akuzuar njëri-tjetrin për fajtor të dështimit.
Rama
Kryeministri ishte i pari që foli për mediat në përfundim të tryezës me kreun e opozitës, që përfundoi rreth orës 20:00.
“Fatkeqësisht nuk e bindëm dot Partinë Demokratike për të votuar së bashku draftin e nënshkruar bashkarisht.
Më vjen mirë t’u them të gjithë shqiptarëve sot që bëra të gjitha përpjekjet e mundshme, i bëmë të gjitha përpjekjet e mundshme për t’u dhënë kundërshtarëve tanë mundësi reale kompromisi pa cënuar përmbajtjen thelbësore të projektit”, tha Rama.
Kryeministri shtoi se në tryezë ka shkuar me një plan të ofruar nga ekspertët e huaj për të lehtësuar dialogun dhe afrimin e qëndrimit mes palëve.
“Ne e kishim pranuar 100 përqind këtë plan, ku përfshihej edhe shumica e cilësuar e 2/3 që është kërkuar pa pushim nga Partinë Demokratike pas leximit të parë të raportit të Venecias”, tha ai.
Por as kjo, sipas Kryeministrit nuk bindi Partinë Demokratike, që Rama thotë se e priste.
“Për habinë e shumëkujt, por jo timin, PD e refuzoi këtë ofertë që barazon shumicën dhe opozitën në përzgjedhjen e kandidatëve në sistemin gjyqësor.
Nuk hyj tek ata që mendojnë se Partia Demokratike e do reformën e drejtësisë. Partia Demokratike nuk ka lënë gur pa lëvizur për ta zvarritur këtë reformë dhe për të ndryshuar thelbin e saj”, deklaroi Rama
Shefi i Qeverisë thotë se me këtë takim u jepet fund justifikimeve të opozitës për të mos e votuar reformën.
“Ne nuk do ta presim më PD. Do të vazhdojmë në rrugën e vetme që kemi, por deri ditën e votës në Parlament, ka plot orë dhe jo pak ditë që demokratët të mos e humbasin bashkë me këtë tren. Pas këtij takimi, reforma do të shkojë drejt e në sallën e Parlamentit”, tha Rama.
Basha
Sipas kryetarit të Partisë Demokratike, dështimi i negociatave erdhi pasi Edi Rama refuzoi një propozim të ekspertëve të OPDAT dhe Euralius, e që ka të bëjë me vendet e rezervuara në institucionet e reja.
“Erdha sot në këtë takim me përfaqësuesit më të lartë të maxhorancës me vullnetin për të kërkuar dhe ofruar zgjidhje, që do t’u japim shqiptarëve një drejtësi që lufton dhe nuk mbron korrupsionin dhe krimin e organizuar. Kapja politike është korrupsioni i korrupsionëve, baza e çdo të keqeje. Prej muajit shkurt PD ka pranuar versionin e vendeve të rezervuara, të propozuar nga OPDAT dhe Euralius dhe të sanksionuar nga Venecia, që vështirëson në ekstrem kapjen politike të institucioneve të reja të drejtësisë.
Me siguri kryeministri ka shprehur këtu që është PD ajo që pengon reformën. Faktet tregojnë të kundërtën. Sot detajuam para kryeministrit propozimin tonë bazuar mbi rrugëzgjidhjen që vendet e rezervuara. Kryeministri nuk pati asnjë argument kundër kësaj, thjesht nuk i pëlqen. Kjo është kapriço dhe mungesë vullneti që t’i japësh vendit reformën në drejtësi së bashku me opozitën”, u shpreh Basha.
Basha pati edhe një mesazh për deklaratën e Edi Ramës që tha se pas këtij takimi ka përfunduar edhe koha për Partinë Demokratike dhe se drafti do të dërgohet për votim në Kuvend.
“Çdo dërgim do të takohet atje me dështimin e sigurtë dhe çdo dështim do të thotë shtyrje e reformës në drejtësi. Ky ka qenë qëllimi i maxhorancës prej fillimit. Kemi dyshime që qeverisja aktuale e zhytur në korrupsion dhe krim është e interesuar në krijimin e një drejtësie të pakontrolluar”, tha lideri i opozitës.
/tesheshi.com/
