Pelegrinët iranianë do ta kenë me sa duket të pamundur ta kryejnë haxhin këtë vit, obligimin fetar për të gjithë muslimanët.
Arabia Saudite dhe Irani nuk kanë arritur një marrëveshje mes tyre, edhe pse shenjat qenë të mira. Sauditët e akuzojnë palën iraniane për politizim, e se është larguar shpejt të premten nga bisedimet, sido që në tavolinë ka patur oferta për kërkesat e Iranit.
Ministria e Haxhit dhe Umres ka deklaruar se delegacioni iranian i haxhit po bënte politikë, duke mos pranuar t’i nënshkruajë procesverbalet e marrëveshjes së negociuar gjatë kësaj jave.
Dikasteri saudit njoftoi se të mërkurën e të enjten kishte patur bisedime të gjata, e se ishte arritur marrëveshja në parim për një varg çështjesh. Sipas Ministrisë së Haxhit, vendimi ishte një tregues i qartë se Irani kërkonte ta politizonte çështjen.
Në një deklaratë të palës saudite thuhet se qeveria iraniane “do të jetë përgjegjëse para Allahut të Plotfuqishëm dhe popullit të vet për pamundësinë që qytetarët iranianë ta kryejnë haxhin këtë vit”.
Përndryshe, Seid Ohadi, drejtuesi i departamentit iranian që organizon haxhin, do të thoshte në televizionin shtetëror të vendit të tij se Irani nuk do të dërgonte pelegrinë në Arabinë Saudite nëse nuk garantohej siguria e tyre. “Mungesa e vendimeve të unifikuara” nga zyrtarët sauditë, sipas Ohadit, ka sjellë shtyrjen e marrëveshjes.
Polemika dhe përplasja e fundit për marrëveshjen mbi pelegrinët iranianë që do të kryejnë haxhin është vijim i tensionit në vazhdim midis Arabisë Saudite dhe Iranit. /tesheshi.com/
