Bisedat në Bruksel kanë përfunduar pa marrëveshje për zgjidhje të krizës politike në Maqedoni përmes bisedimeve, kumtoi LSDM.
“Nuk është i përmbushur kushti për çështjen thelbësore rreth hapjes së bisedimeve, organizimit të Qeverisë që nuk do ta kryesojë Nikolla Gruevski. Kryetari Zaev dhe delegacioni i LSDM-së i kanë qëndruar konsekuentë të pozicionit parimor që është qëndrim edhe i qytetarëve të Republikës së Maqedonisë, thuhet në kumtesë.
Shtojnë se nuk ka tregtim me lirinë dhe vlerat demokratike që i meritojnë qytetarët e Maqedonisë, si dhe bashkëqytetarët tanë nga Evropa. Negociatat kishin filluar në ora 12.00, por edhe pas gjithë përpjekjeve dhe propozimeve Zaev dhe Gruevski nuk kanë lëvizur nga pozicionet e tyre fillestare.
Derisa Zaev ka kërkuar qeveri teknike apo kalimtare pa Gruevskin si kryeministër, ky i fundit ka pranuar qeveri teknike, por që qeverisja e tij të vazhdoj deri në dhjetor dhe të jetë një qeveri e zgjeruar e cila do të kryej të gjitha pikat e marrëveshjes për organizimin e zgjedhjeve të caktuara në prill të 2016.
LSDM ka kërkuar që Gruevski në asnjë variant të mos jetë pjesë e bashkëqeverisjes kalimtare dhe është kërkuar deinstalimi i sistemit të vendosur nga pushteti aktual.
Eurokomisioneri Johannes Hahn për shkak të negociatave të stërzgjatur sot ka anuluar vizitën e tij të caktuar për sot në Sarajevë.
Ai kishte insistuar që palët të arrijnë marrëveshje gjatë këtij takimi. Lidhur me takimin pritet një konferencë apo deklaratë e eurokomisionerit Hahn.
