Dështimi i takimit Rama-Basha, Uashingtoni fajëson opozitën dhe i bashkohet BE-së për vota të vullneteve personale për reformën në drejtësi

Më në fund, Uashingtoni e ka bërë të qartë qëndrimin e tij lidhur me takimin e dështuar mes  kryeministrit Rama dhe kreut të opozitës Basha, duke fajësuar opozitën dhe  duke iu bashkangjitur qëndrimit të BE-së, shprehur një ditë më parë, për vota të vullneteve personale, të dala nga radhët e opozitës, si një shans për miratimin e reformës në drejtësi; që do të thotë se deputetë të saj duhet të marrin përgjegjësi historike e ta votojnë reformën, pavarësisht vendimit partiak.

Deklarata e lëshuar nga ambasada e SHBA në Tiranë, e bën më të qartë tashmë qëndrimin amerikan pro-reformës, ashtu siç është drafti i saj, pa marrë në konsideratë kërkesën më të fundit të opozitës për vende të rezervuara.

E tashmë pritet se si do të jetë reagimi i PD-së, teksa një ditë më parë u përgjigj se do të dorëzonte mandantet nëse nga grupi i saj rridhnin vota për miratimin e reformës në drejtësi.

Deklarata e ambasadës amerikane:  

Ambasada e Shteteve të Bashkuara shpreh zhgënjimin e saj që takimi i 6 qershorit mes Kryeministrit Rama dhe Liderit të Opozitës Basha nuk arriti një vendim përfundimtar mbi reformën në drejtësi. Qeveria shfaqi fleksibilitet, por, në fund, opozita nuk bëri të njëjtën gjë.  Prandaj, Qeveria e Shteteve të Bashkuara mbështet përpjekjet e Qeverisë shqiptare për ta çuar draftin drejt miratimit. Do të jetë përgjegjësia e anëtarëve individualë të parlamentit të vendosin nëse duan të mbajnë sistemin e sotëm të drejtësisë të korruptuar dhe të politizuar apo nëse do ta mbështesin këtë reformë.

Për më shumë se 18 muaj, ekspertë vendas dhe ndërkombëtarë, politikanë, shoqëria civile, dhe publiku, janë angazhuar në një debat të rëndësishëm mbi reformën e drejtësisë në Shqipëri. Ky proces shterues e ka përmirësuar draft-paketën e reformës dhe e afroi qeverinë dhe opozitën drejt një marrëveshjeje. Kjo reformë, të cilën e mbështesin shumica dërrmuese e shqiptarëve, mbetet një prioritet kyç për Shtetet e Bashkuara. Shtetet e Bashkuara do të punojnë për t’u siguruar që drafti përfundimtar i paraqitur në Komisionin e Posaçëm për Reformën në Drejtësi dhe në Parlament, të jetë një draft i drejtë, që përfaqëson idetë më të mira të ekspertëve vendas, ekspertëve ndërkombëtarë, dhe Komisionit të Venecias.

/tesheshi.com/