Në një mesazh të orëve të fundit, pasi nuku mundësua koalicioni LDK-VV, kreu i së parës, Isa Mustafa, nuk e fsheh kënaqësinë e sfidës që forcat kryesore, do hahen kokë më kokë të vetme më 6 tetor.
“Nga sot fillon gara e vërtetë. Kush nga partitë, LDK, VV, PDK dhe kush nga koalicionet, Nisma-AKR-PD apo AAK-PSD, sikurse edhe koalicionet e komuniteteve joshumicë do të kenë përkrahje më të madhe qytetare.
Nga Kuvendi i LDK-së, më 3 gusht, u kam bërë ftesë publike partive më të mëdha që të matemi veç e veç në zgjedhje.
Zgjedhje të vërteta janë vetëm ato, për fatin e të cilave vendosin qytetarët dhe jo koalicionet parazgjedhore”.
Por Isa Mustafa lë të kuptuar se pas zgjedhjeve, ai e Albin Kurti do mundësojnë formimin e një qeverie të përbashkët.
“Bashkërenditja e opozitarizmit me VV-në dhe bisedat për të qeverisur bashkë, na kanë ofruar për shumë interesa të vendit. Prandaj, me përkushtim do të vazhdoj të punoj të rrumbullakësojmë koalicionin paszgjedhor, në kushte të respektimit reciprok.
LDK me tërë potencialin e saj do të punojë për ç‘kapjen e shtetit dhe dekriminalizimin e tij, ta zhvillojë ekonominë e të hap vende pune; të rikthejë partneritetin me BE dhe SHBA.
Koalicioni ynë i parë është me qytetarin!
E keni LDK-në! Kandidaten e LDK-së për Kryeministre dhe ekipin që s’e ka askush. Së bashku me ju që e doni shtetin tonë, sot shfletojmë faqen e Re!”, shkruan Isa Mustafa. /tesheshi.com/
