Nga Blendi Gashi
Drejtësia në Kosovë nga paslufta është përballur me maskat e zeza, persona që me nga një çorape në kokë kanë terrorizuar jo pak qytetarët, gjë të cilën fatkeqësisht po e bëjnë edhe sot pas 18 vjet nga çlirimi.
Dhe sulmet si atëherë dhe tani po bëhen prapa shpine, ndërsa rezultati po mbetet i njëjtë “hetimet vazhdojnë”.
Edhe pse janë ndërruar një rrjet i tërë i drejjtuesve të institucioneve të drejtësisë, rastet si ato të pasluftës, pra vrasjet që cilësohen politike nuk janë zbardhur ende.
Dhe duke parë “gjumin” e organeve të hetimit nuk është aspak e çuditshme që edhe autorët e sulmeve të fundit ndaj njerëzve të shtetit, të afërmëve të tyre e gazetarëve të kenë të njëjtin fat.
Njohës të fushës së drejtësisë dhe ekspertë të sigurisë pranojnë se sistemi i drejtësisë ka dështuar pasi agresorët nuk po kapen dhe ekziston rreziku që sulme të tilla të ndodhin dhe të rrezikohet jeta e qytetarëve.
Ata thonë se sistemi i drejtësisë duhet reformuar urgjentisht dhe të merren në përrgjegjësi të gjithë drejtuesit që kanë dështuar të bëjnë punën e tyre dhe të zëvendësohen me kuadro profesionale, pra të rinjë të pa korruptuar.
Hajrullah Tërrnava, ekspert i çështjeve të sigurisë thotë se rrahjet që ndodhën në muajin gusht dëshmojnë se shteti është kapur për fyti prej të “fortëve” të tij.
Ai shton se dikush po përdor forcën me qëllim që të arrijë atë që do dhe këtë po e bën përmes shërbimeve sekrete apo shërbëtorëve që i paguan.
“Argumenti më i fortë është rrahja e drejtorit të burgut, ku babai i një prej të dyshuarve ka treguar se djali i tij është paguar me 500 euro.
Mjerisht tani edhe pse dihen emrat e autorëve ata gjenden në arrati, se këtë ua ka mundësuar dikush.
Qytetarët në tërësi gjenden të habitur sepse dihet Kosova kurrë s’ka pasur më shumë policë se sa sot, kurse veprat janë sërisht të pazbuluara. Mjerisht këto raste tregojnë se institucionet e drejtësisë kanë dështuar dhe po vërehet se ato janë në shërbim të pushtetarëve që e kanë kapur shtetin për fyti”, thotë Tërrnava për tesheshi.com.
Sipas tij, për të dalë nga kjo situatë e krimit dhe gjendjes së amullisë në të ardhmen, shoqëria kosovare duhet të bëjë reforma rrënjësore e posaçërisht në gjyqësor, prokurori e polici dhe në krye të këtyre institucioneve duhen të emërohen njerëz profesionalisht të aftë dhe me duar të pastërta, të cilët duhet ta luftojnë krimin me hapa të shpejt.
Por sipas Tërrnavës, që kjo të realizohet, duhet që të gjithë ata që janë pasuruar në mënyrë të paligjshme të burgosen dhe t’iu konfiskohet pasuria.
“Këta që e kanë katandisur këtë shoqëri deri në këtë nivel qofshin ministra, kryeministra apo kryetar komunash, duhen gjithsesi të ndëshkohen dhe të dënohen me burg për veprat e kryera për t’iu dhënë mësim të tjerëve që në të ardhmen të punojnë me ndershmëri dhe në interes të shtetit konform ligjit, e jo si deri tani që kanë punuar për përfitimet e tyre”, thotë Tërrnava.
Ehat Miftaraj nga Instituti i Kosovës për Drejtësi (IKD) thotë se reagimi i institucioneve përgjegjëse nuk ka qenë në nivelin e duhur përballë sulmeve të fundit që kanë ndodhur në vend.
“Çka e bën edhe më shqetësuese reagimin e dobët të institucioneve është fakti se sulmet kanë ndodhur në një pjesë të kryeqytetit.
Mos zbulimi i urdhëruesve të këtyre veprave padyshim është mesazhi më i keq që mund t´i dërgohet qytetarëve dhe të urdhëruesve të krimeve, të cilët mund të besojnë se mund të kryejnë vepra penale pa pasur frikën e ndëshkimit”, thotë Miftaraj për tesheshi.com. /tesheshi.com/
