Nga Blendi Gashi
Ka përfunduar në një “asgjë” rasti i Sokol Bashotës, kreu i komunës së Klinës nga PDK, për të cilin u bë shumë zhurmë një vit më parë, pasi policia bastisi zyrat e komunës, ndërsa ai vetë nuk u gjet në zyrë.
Prokuroria më pas ngriti ndaj tij disa akuza për shpërdorim detyre, por ja që tashmë ka hequr dorë prej tyre, duke dhënë si justifikim ligjor “mungesën e provave”.
Pra, një organ akuze nuk është i aftë që të sigurojë një sasi provash në rrugë operative, aq sa për të qenë e sigurt në aksionet që ndërmerr, aq më tepër kur është fjala për zyrtarë shteti me peshë.
Dhe kjo çon në dyshim se zbrapsja e Prokurorisë ndaj njerëzve me pushtet, siç në rastin konkret me Bashotën, është jo një “mungesë provash” por një mungesë këllqesh për të çuar pas hekurave të ashtëquajturit “peshq të mëdhenj”. A nuk mjafton goditja që ajo i bën kredibilitetit moral dhe profesional të vetvetes, ku pasi ndërmerr gjithë atë aksion policor të bujshëm, në fund thotë “ne paskemi qenë gabim!”.
Ja ç’tha Bashota për prokurorët pas bastisjes…
Dhe një vit e gjysmë nga bastisja që ju bë, Bashota ka dalë fitimtar ndaj prokurorëve të cilët i paralajmëroi atë natë se do ta humbin betejën me të.
“Nëse kanë tendencë me denigru personalitetin tim, le ta dijnë ata prokurorë se kanë me humb betejën sepse vet ata janë të korruptuar”, ka thënë Bashota, duke shtruar pyetjen atëkohë se “pse prokuroria nuk merret me 70 lëndët që rëndojnë mbi kryeminstrin Isa Mustafa?!”
Duke folur për bastisjet, ai ka thënë se nuk është dashur të ndodhin me aq pompozitet siç është bërë.
“Jo vetëm nga ana ime si kryetar komunal, por edhe nga vet stafi nuk ka qenë një bastisje e nevojshme me këtë pompozitet pasi dokumentet janë në faqen e komunës së Klinës, kështu që s’ka pas nevojë të bëhet një zhurmë e madhe për asgjë. Ka tendenca për arsye se unë jam një ndër ata që ja kam ndryshu pamjen e Klinës dhe jam njeri i vetëm që kam ndërtu raporte ndër fetare, duke ofruar mysliman e katolik të jenë së bashku në festa fetare”, deklaroi Bashota pasi u bastis nga policia.
Kujtojmë se aktakuzat janë ngritur dhe më pas janë hedhur poshtë edhe ndaj kryetarit aktual të Gjianit, Lutfi Hazirit, ish-kryetarit të Gjakovës Pal Lekaj, ish-kryetarit të Gjilanit, Qemajl Mustafës, ish-ministrit të Arsimit Ramë Buja. /tesheshi.com/
