Dëshmitarët e sulmeve të trefishta vetëvrasëse në Aeroportin “Ataturk” të Stambollit, kanë ndarë detaje tmerruese me gazetarin e RT, në lidhje me përvojën e hidhur nga sulmi në të cilin humbën jetën 41 persona dhe 239 mbetën të lënduar.
Qeveria turke e ka lidhur sulmin terrorist me Shtetin Islamik.
Ahmed Furkan Gurtuna, i cili punon si zyrtar i policisë së trafikut në aeroport, në momentin e sulmit ka rastisur në kontrollin e pasaportave, ka rrëfyer në lidhje me ngjarjet, të cilat janë zhvilluar para syve të tij.
“Pashë një terrorist duke u futur në aeroport, duke mbajtur një AK47 tek po shtinte në civilë… Policia turke donte ta vriste atë dhe pastaj dëgjova shpërthimin e bombës”, thotë ai.
Me gjithë sigurinë e lartë në aeroportin e tretë më të frekuentuar në Evropë dhe megjithëse ishin qëlluar nga policisë turke, sulmuesit arritën të kalojnë pikat e kontrollit të sigurisë në sallën e arritjeve dhe të shpërthejnë pajisjet eksplozive.
Kamerat ÇTV kapën momentin kur një nga sulmuesit u qëllua nga një oficer i sigurisë, por megjithatë arriti të aktivizojë mjetin shpërthyes.
Besohet se sulmi është kryer nga së paku tre sulmues vetëvrasës, njofton Reuters.
Dëshmitarët lokalë që ishin në vendngjarje kujtojnë detajet e sulmeve të tmerrshme, të cilët mezi i kishin shpëtuar fatit të atyre që ishin vrarë:
“Pashë njerëz duke rënë në tokë para syve të m’i. Katër ranë për toke, ishin bërë copë e grimë”, thotë ajo.
“Gjatë kohës sa sulmuesit po gjuanin në këdo që po takonin, njerëzit ishin në kërkim të një vendi të sigurt”, tregon një dëshmitar tjetër.
“Gjersa isha në zyrën time, duke shërbyer në ndërrim të natës, dëgjova fillimisht 10 të shtëna të cilat u pasuan me një shpërthim. Ne braktisëm zyrën për të ikur, pastaj shpërtheu bomba e dytë dhe po shihja njerëz të tmerruar në çdo anë”, rrëfen një punëtor lokal.
Alaattin Kilic, një gazetar me bazë në Turqi përshkruan ndjenjat e njerëzve pas sulmit në vendin e ngjarjes si “dramë totale”.
“Ka aq shumë njerëz të cilëve po iu bie të fikët dhe mbizotëron një dramë e vërtetë”, tha ai duke raportuar nga vendi i ngjarjes.
“Qytetarë të zakonshëm dhe njerëz të shqetësuar për fatin e familjarëve të tyre po vijnë me fytyra të lemeritura”, shtoi gazetari.
“Po shoh shumë njerëz duke mbajtur zi për të afërmit e tyre, dhe njerëz duke qarë…të gjithë janë në një gjendje të tmerrshme”, përfundon ai. /tesheshi.com/
