Në një rrëfim të tij mbi 21 Janarin tragjik të 10 viteve më parë, gazetari Sokol Balla tha, e kjo e bërë publike për herë të parë, se për kreun e opozitës së atëhershme Edi Rama ishte bërë gati një mandate arresti.
Por sipas tij, do ishin pamjet e së vartetës së vrasjeve nga Garda ato që e shpëtuan nga prangat atë që sot drejton qeverinë.
“Sipas informacioneve që kam unë, gjithçka ishte bërë gati dhe mandat arresti ndaj tij ishte bërë gati.
Gjithë skemën e prishi News 24.
Z.Rama sigurisht nuk ishte në dijeni. Ai siç ju thashë ishte në një kafe bashkë me Paulin Stërkaj dhe përballë kishte derën e drejtorisë së Policisë ku pas pak me shumë gjasë do të dilnin policët që do ta arrestonin. Nuk besoj se ai kishte dijeni dhe nuk besoj që ai ndjente ndonjë frikë personale ndaj vetes së tij.
Mesa di unë, ai në orët, pasi u bllokua në Urën e madhe tek Bulevardi Dëshmorët e Kombit, ishte kthyer më pas është mbyllur dhe e ka ndjekur ngjarjen nga zyra e tij.
Por besoj se z.Rama nuk ishte fare në dijeni të arrestimit të tij, megjithëse ne të tjerët po e kuptonim, se skema po plotësohej dhe po shkohej drejt këtij akti final. Por siç e thashë, në fund fare ishte media dhe gazetarët që e shpëtuan Shqipërinë nga një skenar shumë i errët”, tha Balla në një special kushtuar ngjarjeve të 21 janarit 2011.
