Dëshmia e ish-kryeministrit Sali Berisha për marrëveshjen me CEZ do të realizohet vetëm nëse në krye të komisionit hetimor, Taulant Balla të zëvëndësohet me dikë tjetër.
Është ky kushti i ri i Partisë Demokratike, i kryer përmes një letre të hapur nga Arben Ristani. Ai ka sqaruar se Balla ka konflikt interesi me familjen Berisha, pasi është dënuar me 10 milionë lekë për shpifje.
“Gjykata e ka dhënë vendimin, ju jeni dënuar si shpifës me vendim gjyqësor. Në këto kushte, kur ka shkaqet të dukshme njëanshmërie, njerëz që merren me hetime mund t’i vazhdojnë ata, dhe në këtë rast ka një shkak të dukshëm njëanshmërie, për shkak të inateve personale që keni me familjarë dhe të afërm të zotit Berisha. Këtu nuk jemi për inatet personale, ato nuk i nxjerrim këtu. Duke qënë se jemi detyruar të zbatojmë ligjin, ju them se keni konflikt interesi. Zoti Berisha do të vijë në këtë seancë menjëherë sapo të largohet koflikti ligjor i interesit”, shkruan Ristani në letrën, që i është dërguar edhe kryetarit të Kuvendit, Ilir Meta.
Nga ana tjetër, Balla e cilësua kërkesën një veprim të ulët për të shmangur dëshminë.
“Kjo është një kërkesë e ulët për të shmangur dëshmitarin nga llogaridhënia. Ky komision thërret dëshmitarë dhe për fat të keq jo të pandehur. Dëshmitari do të merret me forcë dhe do të vijë në këtë komision”, tha Balla.
Përmes këtyre argumeteve, ish-kryeministri nuk është paraqitur në mbledhjen e sotme të komisionit hetimor për CEZ, ndërsa herën e fundit që ishte i pranishëm (dy javë më parë) ai pati debate të forta dhe akuza të ndërsjellta mes tij dhe kryekomisionerit Balla./tesheshi.com/
