Qyteti i Bucha-s pranë Kievit u çlirua nga forcat ukrainase pasi u bë skena e luftimeve të ashpra. Të paktën 20 burra me rroba civile u gjetën të vrarë në një rrugë pasi forcat ukrainase morën qytetin nga rusët.
Halyna Tovkach është ende në kërkim të trupit të bashkëshortit të saj Oleg. Vdekja e tij, thotë ajo, është pjesë e një krimi lufte në të cilin ushtarët rusë vranë dy djem dhe nënën e tyre.
Ngjarja ka ndodhur më 5 mars në mëngjes kur dy familje, fqinje, kanë tentuar të arratisen, raporton The Guardian.
Halyna dëshiron që të gjithë të dëgjojnë historinë e tyre.
Dy familje, të tmerruara nga granatimet e vazhdueshme, vendosën të largoheshin nga Bucha. Ata paketuan pije dhe ushqime dhe planifikuan një rrugë për në fshatin Romanivka në perëndim të Ukrainës. Ata do të udhëtonin në një kolonë.
Në makinën e përparme, një Ford i bardhë, ishin Oleksandr Chikmariov, gruaja e tij Margarita dhe dy djemtë e tyre, Matvey 8 vjeç dhe Klim 4 vjeç. Pas tyre ishin Oleg, gruaja e tij Halyna, e cila do të ngiste makinën gjatë gjithë rrugës, pasi burri i saj nuk kishte patentë shoferi, si dhe Tetiana Kovalenko, nëna e gruas së djalit të tyre Roman.
“Makina e familjes Chikmariov ndaloi papritur dhe unë gjithashtu. Pashë derën e makinës së përparme të hapur. E vetmja gjë që më erdhi në mendje ishte mendimi se të gjithë ishin vrarë. Gjithçka ndodhi kaq shpejt.
Burri im po bërtiste që unë të kthehesha dhe më pas ndjeva se plumbi më goditi shpatullën e djathtë. E bëra burrin tim të zbriste nga makina, por ai nuk lëvizi. E kuptova se kishte vdekur”, tha Halyna.
Makina e përparme mori flakë menjëherë pas kësaj dhe vetëm Oleksandr i mbijetoi sulmit. Gruaja dhe dy djemtë e tij u vranë menjëherë. Edhe Halyna ishte e mbijetuar e vetme e makinës së saj. Ajo është ende në spital. /tesheshi.com/
