Në senacën e sotme gjyqësore kundër Grupit të Kumanovës, i akuzuari Bajram Elshani ka prezantuar dëshminë më të tmerrshme deri tani gjatë këtij procesi.
Gjatë dëshmisë ai qartë ka aluduar se pas arrestimit në Kumanovë është dhunuar seksualisht nga policët maqedonas, edhe pse shkaku i turpit nuk ka treguar të gjitha detajet.
“Më kanë shty në WC, dy polic, njëri prej tyre është zhvesh …turpërohem të tregoj rastin, … ka qenë me uniformë të “Tigrave”. Unë sikur të isha terrorist nuk do të isha këtu. Por, fajtor jam vet që jam dorëzuar. Pastaj na kanë dërguar në gjykatë. Më shumë jam rrahur në objektin e gjykatës se sa në stacionin policor. Për mua, kjo jetë nuk është më interesant”, ka theksuar përgjatë dëshmisë së tij Elshani.
Në pyetjen e avokatit mbrojtës se a ka dëgjuar krisma në stacion policor, që të zbardhet rasti nëse bashkëluftarët e tij janë vrarë pas arrestimit, Elshani ka thënë se nuk është i sigurt. “Më duket se ka pasur krisma. Nuk jam i sigurt, ndoshta veshët më kanë bë”, është përgjigjur Elshani.
Kujtojmë se vitin e kaluar në “Lagjen e Trimave” në Kumanovë, një grup i armatosur është përleshur me forcat e sigurisë të Maqedonisë. Nga rasti në fjalë, u vranë 8 policë nga njësitet speciale dhe nga njësitet e veçanta të MPB-së, ndërkaq 4 të tjerë u plagosën. Nga ana tjetër humbën jetën edhe 10 pjesëtar të grupit të armatosur. /tesheshi.com/
