Refugjatët që kanë mbërritur në 2015-ën e azili i të cilëve është refuzuar do të detyrohen ta lënë Suedinë. Bëhet fjalë për rreth 80.000 refugjatë që nuk kanë qenë fatlumë në aplikimet e tyre për azil.
Ministri i Brendshëm, Anders Ygeman, është cituar nga mediat suedeze të ketë deklaruar se qeveria i ka kërkuar policisë, si dhe autoriteteve të ngarkuara për trajtimin e refugjatëve, të organizojnë nxjerrjen e tyre jashtë vendit.
“Po flasim për 60.000 njerëz, por numri i tyre mund të shkojë deri në 80.000,” ka thënë ministri në fjalë.
Ygeman sqaroi se refugjatët do të mbarten jashtë Suedisë duke përdorur avionë të posaçëm për ta, për shkak të numrit të madh të tyre, e jo me avionë të linjave të rregullta.
Suedia ka pranuar më tepër se 160.000 azilkërkues vitin e shkuar, dhe është një prej vendeve të BE-së që ka marrë më shumë refugjatë në raport me popullsinë. Kontrollet e shtuara që në fillim të janarit kanë sjellë tkurrjen e ndjeshme të numrit të refugjatëve që arrijnë në Suedi. /tesheshi.com/
