Lëvizja konservatore serbe “Nashi” vendosi në qendër të Beogradit postera me figurat e presidentit të SHBA-së Donald Trump dhe njeriut më të pasur në botë Elon Musk, nën sloganin e “Serbisë së Madhe”.
“Ky veprim, të cilin shumëkush e cilësoi si nacionalist dhe provokues, vjen në një kohë kur tensionet për çështje historike dhe pretendime territoriale janë shtuar në rajon”, njoftoi Shoqata e Mediave Elektronike.
“Ndërsa lëvizja konservatore “Nashi” pretendon se fushata është një thirrje për të “ringjallur sërish Serbinë” dhe korrigjimin e padrejtësive historike ndaj popullit serb, shumë qytetarë dhe analistë besojnë se kjo përmbajtje mund të shkaktojë përçarje të mëtejshme dhe të inkurajojë qëndrime ekstremiste në shoqëri”, shton shoqata në fjalë.
“Ekspertët paralajmërojnë se ky lloj promovimi mbart rrezikun e intensifikimit të tensioneve kombëtare dhe se duhet pasur kujdes se si prezantohen temat historike në hapësirën publike, veçanërisht në një rajon multietnik siç është Ballkani”, thuhet në deklaratë.
Kujtojmë se segmenteve nacionaliste serbe u është mbushur mendja top se me riardhjen e Trump-it në drejtimin e SHBA-së, ai do jetë krah Serbisë. /tesheshi.com/
