Roma – Çezena do të përcaktohej që në fillim si çerekfinalja më e dobët e Kupës së Italisë. Çezenës së vendit të tretë nga fundi në Serinë B nuk i njihej asnjë mundësi që t’i bënte ballë furisë së Romës.
Por ndryshe parashikimeve, në fushë ka patur një histori tjetër. Eshtë parë në “Olimpico” një Romë që ka vuajtur shumë, e që fitoren dhe kualifikimin e ka siguruar vetëm në minutën e 97-të, falë një 11-metërshi të kthyer në gol nga Totti.
Dzeko do të ishte futbollisti që në ndeshjen e mbrëmshme do ta kalonte së pari Romën në epërsi në minutën e 68-të. Një epërsi që zgjati vetëm pesë minuta. Pas gabimit të portierit vendas, Garritano do të tregohej i gatshëm për të shënuar.
Presioni i Romës ndaj një Çezene të vendosur për të bërë surprizën do të konkretizohej në minutat shtesë, kur do të shënonte Totti, për ta mbyllur takimin 2-1.
Roma vihet kështu përballë Lacios në gjysmëfinalet e Kupës së Italisë. Që së bashku me përballjen Juventus – Napoli përbëjnë dy sfidat e ardhshme të këtij aktiviteti.
Dy takimet e para të gjysmëfinaleve do të luhen më 1 mars. /tesheshi.com/
