Lacio humbi 0-2 dje ndaj Romës në derbin e kryeqytetit italian. Një humbje e shoqëruar me nervozizëm në fushë e jashtë saj.
Nuk i është shmangur këtij nervozizmi as Senad Luliç, lojtari lacial, që për një prej kundërshtarëve, mbrojtësin me ngjyrë, Antonio Rudiger, ka përdorur fjalë fyese, duke thënë se, “ai deri para dy vitesh shiste çorape e rripa në Shtutgart”.
Luliç nuk ka pranuar t’i tërheqë fjalët pas ndeshjes, një stereotip racist për njerëzit me ngjyrë, edhe pse Rudiger nuk ka pasur një përvojë të tillë.
Atë që nuk e ka bërë Luliç, e ka bërë ekipi ku ai luan, Lacio, që ka kërkuar falje për incidentin.
“Klubi është lënduar nga këto komente dhe nga mënyra si janë interpretuar. Kërkoj ndjesë në emër të klubit. Këto janë deklarata të bëra nga një lojtar që sapo ka humbur derbin,” ka deklaruar një prej drejtuesve të klubit lacial, Arturo Diaconale.
“E rëndësishme është të pranohet gabimi. Ne duam që gara të jetë në atmosferën e lojës së ndershme, çka është stili i Lacios.”
Roma ruajti vendin e dytë në Serinë A me fitoren e djeshme, ndërkohë që Lacio zbriti në vend të pestë, me po aq pikë sa Napoli i renditur më sipër. /tesheshi.com/
