Dy skuadrat milionere, me trofe të njëpasnjëshëm të fituar në Angli dhe Francë, po duan të arrijnë në majën e futbollit europian. E për këtë do të ndeshen sonte në çerekfinalen e dytë mes tyre në Champions League, ku njëri ekip do duhet t’i japë fund ëndrrës.
Me ballafaqimin e parë të mbyllur në barazim, 2-2, ky i dyti, i mbrëmjes së të martës, i avantazhon paksa të zotët e shtëpisë. Ndërsa Mançester Siti dhe PSG-ja synojnë gjysmëfinalen e parë në Champions League, në “Etihad Stadium” pritet të ketë një duel të luftuar fort.
Trajneri i francezëve, Laurent Blanc, deklaron se PSG-ja duhet të bëjë një paraqitje të jashtëzakonshme nëse do që të arrijë për herë të parë në gjysmëfinalet e Champions League-s.
Ai e pranon se të dy ekipet kanë projekte të ngjashme, e se synimi i PSG-së është ta fitojë herët a vonë Champions League-n.
“Pritshmëritë janë të larta për ne, e do të qëndrojnë të tilla gjersa të bëhemi kampionë europianë,” ka deklaruar ai.
Në anën tjetër, pavarësisht se një barazim pa gola a me nga një gol i kualifikon vendasit, Manuel Pellegrini, trajneri kilian i Man. Sitit, që është në muajt e tij të fundit në krye të ekipit, e thotë prerë se do të luajnë për fitore.
“Aspekti më i rëndësishëm i këtij ekipi është të shënojë. A mendojmë se duhet të barazojmë 0-0? Kjo nuk është mënyra si luajmë normalisht. Nuk mendoj se një nga ekipet është favorit.”
Takimi mes Mançester Sitit dhe PSG-së do të gjykohet nga gjyqtari spanjoll Carlos Velasco. /tesheshi.com/
