Milani është zot shtëpie në qytetin e modës pas triumfit bindës ndaj Interit mbrëmjen e së dielës.
Kishte kaluar një kohë e gjatë që ky derb nuk prodhonte shumë gola, por i mbrëmshmi qe diçka krejt tjetër, duke paralajmëruar kthimin e shkëlqimit të humbur.
Rosonerët në këtë takim morën pikët e jetës, që në vazhdim do të jenë motivim tepër i madh për vazhdimin e kampionatit dhe për rimëkëmbjen.
Ishte mbrojtësi Alex që në minutën e 35-të ndezi flakë “San Siro”-n, duke i kaluar në epërsi kuqezinjtë. Me rezultatin 1-0 për Milanin mbyllet pjesa e parë e lojës, duke paralajmëruar dramacitet në vazhdimin e saj.
Nerazurët kanë patur mundësinë më të mirë për ta ndryshuar fatin e ndeshjes në minutën e 70-të, por sulmuesi argjentinas Mauro Icardi nuk ka mundur ta çojë topin në rrjetë pas goditjes së 11-metërshit.
Dhe rregulli i pashkruar i futbollit, se kur nuk shënon e pëson, gjen vend menjëherë. Vetëm tre minuta më vonë, Carlos Bacca u tregua shumë i saktë para portës kundërshtare, dhe nikoqirët marrin krahë ndërsa rezultati thellohet në 2-0.
Me dy gola të pësuar, skuadra e drejtuar nga Roberto Mancini duket e demoralizuar dhe e pashpresë, kurse Milani i mbimotivuar gjen golin e tretë me sulmuesin Mbaye Niang.
3-0 për Milanin përfundoi kështu derbi milanez. Në një ndeshje kur thuajse të tëra statistikat janë në ekuilibër, Interi nuk meritonte gjithsesi të humbte kaq thellë. /tesheshi.com/
