Revista javore gjermane Der Spiegel ka shkaktuar polemika brenda dhe jashtë vendit me kopertinën e numrit të fundit ku shfaqet në formë të trukuar presidenti Trump duke mbajtur kokën e prerë të Statujës së Lirisë.
Në të paraqitet një karikaturë e Trump-it me një thikë të gjakosur në njërën anë dhe kokën e statujës, prej së cilës pikon gjak në dorën tjetër. Titulli që e shoqëron: “Amerika e para”.
Artisti i cili ka dizajnuar kopertinën, Edel Rodriguez, një kuban i cili erdhi në Shtetet e Bashkuara në vitin 1980 si refugjat politik, i tha Washington Post: “Kjo ka kuptimin e prerjes së kokës së demokracisë, të prerjes së kokës të një simboli.”
Debati u nxit nga Alexander Graf Lambsdorff, një anëtar i Demokratëve të Lirë të Gjermanisë dhe nënkryetar i Parlamentit Europian, që e ka përshkruar atë si “pa shije”.
Ajo vjen pas një seri sulmesh mbi politikat e Berlinit nga Trump dhe ndihmësit e tij, duke shënuar një përkeqësim të shpejtë në marrëdhëniet gjermano-amerikane. Kujtojmë këtu se kancelarja Angela Merkel ka qenë aleat i ngushtë evropian për ish-presidentin e SHBA-së Barack Obama, duke e vlerësuar atë si “një partner të jashtëzakonshëm”.
Muajin e kaluar, Trump tha se Merkel kishte bërë një “gabim katastrofik” me politikën e saj të dyerve të hapura ndaj emigracionit; ndërkohë që këtë javë këshilltari i tij i lartë për çështje tregtare ka thënë se Gjermania është duke përdorur euron e “nënvlerësuar në masë të madhe” për të krijuar përparësi mbi Shtetet e Bashkuara dhe partnerët e saj evropianë.
Askush nuk ishte i gatshëm për të komentuar në lidhje me kopertinën e revistës Spiegel në ambasadën SHBA në Berlin, njofton Reuters. /tesheshi.com/
