“A po vjen policia e temperaturës për qytetarët gjermanë?”, pyet revista Der Spiegel, duke komentuar ashpër deklaratat e ministrit gjerman të ekonomisë dhe zv/kancelarit, Robert Habeck, për masat që duhen marrë për përballimin e krizës energjetike në dimrin e pritshëm.
Artikulli përkatës trajton çështjen nëse qytetarët gjermanë mund të detyrohen ligjërisht të përdorin më pak gaz natyror dhe më pak ngrohje në dimër.
Në këtë kuadër, Der Spiegel bën një krahasim mes ministrit të Ekonomisë dhe ish-diktatorit rumun Nikolae Çaushesku, me rastin e një deklarate të fundit të Habeck-ut të Gjelbër.
Ministri gjerman i Ekonomisë kishte deklaruar ndër të tjera se “në rast të mungesës së gazit natyror do të duhet të paguajnë edhe familjet”.
“Nëse vëllimet e magazinimit nuk rriten, atëherë do të duhet të marrim masa të mëtejshme për të kursyer energji. Nëse është e nevojshme, me ligj”.
Bazuar në këto deklarime t, revista gjermane u kujton lexuesve të saj se, “diktatori i Rumanisë dikur i bëri njerëzit e tij të dridheshin në një temperaturë dhome prej 12 gradë Celsius”.
“A është Habeck, nga zyra e tij në Scharnhorststraße të Berlinit, duke lëshuar masa shtrënguese për qytetarët që diktatori rumun Nicolae Çaushesku përdori për të kontrolluar popullin e tij?”, pyet revista gjermane, duke shtuar: “A do të shkëputen familjet përkohësisht nga furnizimi me gaz në mes të dimrit?”. /tesheshi.com/
