Deputetja demokrate Albana Vokshi, ka gjetur rastin që çështjen e banorëve të Unazës së re ta përcjellë ndërkombëtarisht dhe si shqetësim mbi të drejtat e grave.
Në Forumin e Grave të Partive Popullore Europiane zhvilluar në Lubjanë, aty ku prezente ishte dhe znj. Doris Pack, demokratja Vokshi denoncoi qeverinë duke thënë se “qindra familje shqiptare, po nxirren me dhunë nga shtëpitë dhe bizneset e tyre në shkelje të konventave ndërkombëtare e të drejtave ligjore e kushtetuese”.
“Kërkoj mbështetjen tuaj për të përcuar shqetësimet e mijëra qytetarëve shqiptarë për shkeljen e të drejtave që mbrohen nga konventat ndërkombëtar. Në asnjë vend europian një kilometër rrugë fushore nuk kushton 20 milione euro. Ne kemi nevojë të flasim më një zë e të jemi të bashkuar në mbrojtjen e vlerave të përbashkëta europiane, që nisin nga mbrojtja e familjeve”, tha znj.Vokshi. /tesheshi.com/
